Kan long lehse ka sien ba nyngkong eh ha ka jylla Meghalaya ban jur ka jingïatan tyllai hapdeng ki party bapher bapher namar wat sa tang shisngi arsngi ban sdang ka jingthep kyrteng jong ki kyrtong ruh ka dang don beit ka jingphet seng ne phet party. Kane ka la jia ym tang ha Ranikor ba u Martin Danggo u phet noh naka NPP ban leit pynïasoh sha ka BJP hynrei wat sha Garo Hills ruh ha kaba u kyrtong ka Congress u Augustine D Marak ula pyndem tdong noh na ka lympung jingïakhun bad kynrandien ban leit ai jingkyrshan noh ïa u kyrtong ka TMC. Nalor kata wat hangne ha East Khasi Hills ruh u kyrtong ka TMC na Pynthorumkhrah u bah Samborlang Diengdoh ruh u phet noh na ka TMC ba rai ban ïakhun kum u kyrtong shimet.
Lada naduh ba sdang kane ka jingïakhun ka la sdang da ka jingïatan tyllai, kynmaw paralok ngin ym phylla ba ha ka 2 tarik Lber lei lei ka jingïatan tyllai bad jingïatan patlun kan long kaba shyrkhei bha nalor ba kan jur ka jingkhlieh dor.Lada ym don kano kano ruh ka party ka ban jop bad ïoh ïa ka jingsynshar marwei ka jingïathied bad khaïi kulai kan long kaba jur bha namar ki lai tylli ki seng saiñ pyrthei naduh ka NPP, TMC bad BJP lad ka jop tang 7 seat ruh ka jingïathied bad khaïi kulai kan jur bha.
Mynta ba dang dei ka por ïa kawang ktieh na rynsan te sngew kumba kim long shuh ban ïatrei lang hynrei sa peit tang shu poi ka 2 tarik shiteng sngi, la leit ïa beh ban ïoh ïatrei lang ban thaw ïa ka sorkar ba thymmai. Mynta ka jingshah kawang ktieh ka NPP te ka la long shaba palat liam hynrei lada jia ba ka NPP ka jop bun bad ïoh biang ban ïalam ïa ka jingsynshar ki ban wan ïeng laiñ ban ïathaw sorkar lang bad ka NPP kin long kine ki juh ki party kiba kawang ktieh ïa ka.
Balei ba ong ba ka NPP ka lah ban ïoh ïalam ïaka jinsynshar ka daw ka long ba ha man la ki Constituency lait noh tang ha ki ar ne lai tylli, ka jingïakhun ka long beit hapdeng ka NPP pyrshan ïa kiwei ki party laka long ïa ka TMC, Congress, UDP, BJP, PDF,VPP, HSPDP bad ter ter. Ym lah ban len hi ruh ba ki kyrtong jongka ha kiba bun ki constituency ruh ki khlaiñ bha ban ki ïa aireng beit ïa ki kyrtong ba ïeng pyrshah ïa ki.
Kaei kaba nga kwah ban ong hangne ka long ba ïa kito ki kyrtong kiba phet seng ha ka minit ba khatduh ruh ki dei ban bishar bniah namar lashai lada wan kito ki party ba ki phet ha ka bor bad lada jia ba ki jop kin leh kumno kin dang nud ban ïatrei lang bad ki. Kumjuh ruh ka jingkyntu ka long ba ka jingïalap election ka dei ban long kaba don burom naduh ka ktien ka thylliej haduh ka jingïakynnoh kynpha. Dei ban tyngkan ïa u thylliej namar mynta ïa kawang ktieh na rynsan hynrei tang ha ka 2 tarik la ïakdup lang bad la ïatrei lang. Ha ka jingïakhun ngim lah ban thikna beit ban jop marwei ïoh lehse ngi donkam hi ka jingïarap jong kiwei ki paralok ban thaw sorkar la ka dei ïa kano kano ka party ruh, kumta khnang ban lait na kano kano ka jingïabuhkhoh ka bha ba tyngkan lypa naduh ba sdang ïa ka rukom kren rukom khana.
