Mairang, K’lyngkot 31: Namar ba ka Model Code of Conduct ka la sdang ban treikam naduh ka sngi ba ka Election Commission jong ka Ri India ka la pynbna ïa ka elekshon sha ka Ïing Dorbar Thaw Aiñ jong ka jylla Meghalaya haduh ka sngi ban da dep pynkut noh ïa ka elekshon.
Kumjuh ruh, namar ba ka jingthep kyrteng jong ki kyrtong kan sdang naduh ka 31 tarik u Kyllalyngkot 2023 haduh ka 7 tarik jong u Rymphang 2023 ha ki por 11:00 baje mynstep haduh 3:00 baje janmiet, u District Magistrate ka Eastern West Khasi Hills District Mairang, ha ka hukum ba la pynmih ha ka 31 tarik u Kyllalyngkot 2023, katkum ka Section kaba 144 jong ka CrPC, u la pakhang ïa ka jingpyndonkam palat ïa lai tylli ki kali da ki kyrtong ha ka por ba ki leit ban thep kyrteng.
U la pakhang ruh ïa ka jingïalum paidbah palat ïa ka san ngut briew bad palat ïa lai tylli ki kali shispah mitar sawdong ka ophis jong u District Magistrate, Eastern West Khasi Hills District, Mairang.
La pynmih ïa kane ka hukum kum shibynta ban khang lad ïa kano kano ka jingïalum paidbah sawdong bad ha rud ha kiar jong ki kamra treikam jong ki Returning Officer, khnang ban ym pynthut ïa ka ïaid ka ieng jong ki briew bad ki kali ha ka por ba ki kyrtong ki leit ban thep kyrteng.
