Nongpoh, Ïaong 30: Ka tnad Animal Husbandry and Veterinary ka Ri Bhoi District lyngba ka Dispensary na Byrnihat mynta ka sngi ka la hiar sha Jorbil Killing, na ka bynta ban ai injek ïa ki ksew ban shim ïa ki lad jingïada ban lait na ka jingpang Rabies lane kata ka jingpang kaba saphriang lyngba ka jingdait ksew bad kiwei ki mrad.
Ïa kane ka jingai injek ïa ki ksew la pynlong ha Jorbil Killing ha ka jingïalam u Dr. Aiban Fancon lem bad ki nongtrei na ka tnad Animal husbandry and veterinary, kiba la poi sha katei ka shnong ba pynlong ïa ka jingai injek ïa ki ksew ha katei ka shnong bad na ki shnoing ba marjan.
Kum ban pynkynmaw, dang hynnin ka sngi, ka tnad ka koit ka khiah ryngkat ka tnad Animal husbandry and veterinary ki la hiar sha katei ka shnong ban ai jinghikai ïa ki paidbah halor ka jingma jong ka jingpang rabies kaba dei na ka jingshah dait ksew, shah dait miaw bad kiwei ki mrad bad mynta ka sngi pat na ka liang ka tnad Animal husbandry and Veterinary ki la pynlong sa ka jingai injekshon ïa ki ksew ba ri da ki nongshong shnong, kane ka jingshism khia ban shim ïa ki lad jingïada ka dei ruh hadien ba kawei ka Longkmie ka la duh noh ïa la ka jingim dang shen ha katei ka shnong, kaba dei na ka jingshah dait ksew ba la suba ba ka dei ka jingpang rabies.
Ha kane ka sngi da ki phew tylli ki ksew jong ki nongshong shnong katei ka shnong la lah ban pyndep ïa ka jingai injekshon kaba long ka lad jingïada ban lait na ka jingsaphriang ka jingpang Rabies.
Haba kren ruh ha kane ka sngi, u Dr. Aiban Fancon u la ai ka jingïaroh ïa ki nongshong shnong kiba la mih paidbah ban wan rah ïa ki ksew na ka bynta ban ioh ïa ka injekshon bad dei tang kane ka lad jingïada kaba ngi lah ban ïakhun pyrshah na ka jingsapriang ka jingpang rabies kaba ktah ym tang ïa ki mrad kaba saphriang ruh sha ki briew lada ym don kata ka jingïada lyngba ka injekshon.
U la ong ruh ban ïa khun pyrshah ïa kane ka jingpang Rabies donkam ban don ka jingïatrei lang na baroh ki liang, namar tang ka sorkar bad ka tnad treikam sorkar ba peit ïa ki mrad kan nym lah ban ïakhun ïa kane ka jingpang bad lada ki paidbah ki shim shisha ïa kita ki lad jingïada ban ai injek ïa ki ksew ne ki miaw ba ki ri kane kan ïarap shibun ban pynduhjïaid ïa kane ka jingpang Rabies.
Shuh shuh, u la bynrap ruh da kaba ong, ba ka tnad Animal Husbandry and Veterinary kan nym shong kli kti bad ka donkam ruh ïa ka jingïatrei lang ki paidbah na ka bynta ban dang bteng ha kaba ïakhun pyrshah ïa kane ka jingpang rabies kaba long kawei na ka jaid jingpang kaba ma bad kaba ktah ïa ki mrad bad ki briew lada ym don kata ka lad jingïada kaba dei ban ai injek ïa ki mrad ba ki ri ha ing ha sem, u la bynrap.
