Plie u MP Rajya Sabha ïa ka Biofloc Fish Farming Unit ba 1.12 klur, nalor kiwei ki kam pynroi ha SAGY- II

Nongpoh, Jymmang 02: Ka long ka jingkyrkhu kaba khraw ïaka shnong Mawlyndep ha Ri-Bhoi District ka shnong bala jied kyrpang da u MP ka Rajya Sabha u Dr WR Kharlukhi ban rah ïaki kam pynroi bad ban long ruh ka model village, hadien ba u Dr WR Kharlukhi mynta ka sngi ba ar u la leit ban plie paidbah ïaka Community Biofloc Fish Farming Unit bad bun tylli kiwei pat ki projek hapoh ka Saansad Adarsh Gram Yojana (SAGY)-II bala pyntrei lyngba ki skhim bapher bapher naki tnad sorkar bapher bapher.
Ïa kane ka Community Biofloc Fish Farming Unit, kaba don 15 tylli ki Unit la tei ha ka jinglut kaba kot sha ka T. 1.12 klur, lyngba ka Meghalaya State Aquaculture Mission 2.0, da ka jingkyrshan lang jong ka DRDA Ri Bhoi District bad ka Power Grid Corporation of India. Kane ka projek ka lah ban pynmih haduh 20,000 kilo ka dohkha ha kawei ka cycle, bad lah ban pyniaid ar sien ha ka shi snem. La khmih lynti ba kane ka projek kan ai ka jingmyntoi kaba khraw bad kan pynkhlain ïa ka kamai kajih jong ki nongrep bad ki nongri dohkha ha ka thaiñ.
Ha kane ka prokram, u Dr. W.R. Kharlukhi, MP Rajya Sabha, u la shim bynta kum u kongsan, katba u Dr. Celestine Lyngdoh, MLA ka Umsning Constituency, u la long kum u Symbud Kongsan.
Kiwei kiba la donlang ha kane ka sngi ki kynthup ïa u Raja Brahma, Project Director ka DRDA bad Nodal Officer ka SAGY, u Bah A. Myrthong, BDO ka Umsning C&RD Block, ka Meda Aihun Khongjliw, Superintendent of Fisheries, Ri Bhoi District, ryngkat bad ki nongialam shnong, ki ophisar sorkar bad ki paidbah nongshong shnong.
Haba kren ha kane ka jingïalang, u Bah Jinu Kharbuki, Rangbah Shnong ka Mawlyndep, lem bad ki Rangbah Shnong jong ki shnong ba marjan, ki la pynpaw ka jingsngewnguh ïa ka sorkar bad baroh ki tnad kiba la trei shitom ban pyntreikam ïa kine ki projek ban kyntiew ïaka roi ka par. Ki la ong ba ka jingkiew shaphrang jong ka Mawlyndep ka dei ka jingïatreilang jong baroh kiba don bynta, khamtam eh u Dr. WR Kharlukhi uba la kyrshan ïa ka shnong naduh ba u la shimti ïa ka hapoh ka SAGY.
Haba kren kum u kongsan, u Dr. Kharlukhi u la pynpaw ïa ka jingsngewkmen halor ka jingroi jong ka shnong hapoh ka SAGY bad u la ïathuh ruh ba haka jylla baroh kawei u la shimti 5 tylli ki shnong ban peit kyrpang, hynrei 3 tylli ki dei kiba ai jingkmen ïa u namar ki kam pynroi kila kiew shaphrang ba kynthup bad kawei naki ka dei ka shnong Mawlyndep ha Ri-Bhoi District.
U la ai jingïaroh ruh ïa ki ki ophisar sorkar kiba la trei shitom ban pynurlong ïa ka thong jong ki kam pynroi bapher bapher ba katei ka shnong kala iohpdiang naduh ki lynti ki syngkien, ki umbam umdih, bad kiwei kiwei bad kane kan kyntiew ïa ka roi ka par jong ka shnong khamtam lyngba katei ka jaka pynmih dohkha kan long ruh ka jingmyntoi ïa ki longïing ban kamai jakpoh bad ban pyndap ïa ka ïing ka sem.