Urlong ka skhim JJM ba 95.38 klur ban pynbiang um ïa ki saw shnong ha Mawlai

Shillong, K’lyngkot, 08: Ka jingangnud kaba la slem bha jong ki saw tylli ki shnong ha Mawlai ban ïoh ïa ka umbam umdih ka la urlong ka la urlong da ka jingtrei shitom jong u MDC u Bah Teiborlang Pathaw ryngkat bad ka Joint Action Committee jong ki saw shnong ban ïoh ïa ka Jal Jeevan Mission (JJM) kaba la mang pisa T. 95.38 klur.
Ïa u Mawnongrim ban pyntreikam noh ïa kane ka project la buh ha ka sngi Saitjaiñ da u Myntri Rangbah ka Jylla u Conrad K Sangma, ha ka jingdon ryngkat lang u Symbud Myntri Rangbah u Bah Prestone Tynsong, u Myntri ka tnat PHE u Bah Renikton L. Tongkhar, u MDC u Bah Teiborlang Pathaw, u Commissioner & Secretary ka tnat PHE u Syed Md Andaleeb Razi ki heh ophisar ka tnat PHE, ka Chief Engineer jong ka tnat PHE bad ki paidbah jong ki 4 shnong.
Kane ka project sam um lyngba ka JJM kaba ka tyllong kan dei na Um Shyllong ha kaba la mang pisa T. 65.76 klur na ka Sorkar India lyngba ka tnat Jal Shakti bad T.28.18 klur na ka Sorkar Jylla ïa kaba la buh ban pyndep hapoh u Lber jong u snem 2024.
Ki shnong ki ban ïoh jingmyntoi na kane ka skhim ki long ka shnong Mawïong Rim, ka Mawïong Umjapung, ka Umthlong bad ka Mawlai Nongkwar Block 13 ka ban kynthup ïa ki 3750 tylli ki longïing.
Haba kren kum u Kongsan u Conrad Sangma u la ong ba ka Jal Jeevan Mission ka dei ka prokram kaba kongsan na ka bynta ka Sorkar India bad ka Sorkar Jylla.
“Ha u snem 2019 mynba la sdang ïa ka Jal Jeevan prokram ka Meghalaya ka la don shatrai eh ha kaba ka jingpynpoi ïa ka umbam umdih sha ki thliew iing jong ki briew ka dang long tang .75 percent hynrei mynta ka Meghalaya ka dei kawei na ki jylla kaba la pyntreikam bha ïa kane ka skhim ïa kaba la ai jingïaroh da u Myntri ka tnat Jal Shakti,” u la ong.
U Myntri Rangbah u la pynpaw ruh ka jingsngewnguh ïa ki ophisar jong ka tnat PHE naduh u Myntri ka tnat PHE haduh ki nongtrei kiba la trei shitom ban aiti lut na ka bynta ban pynurlong ïa kane ka prokram kaba jop.
U la ïathuh ba ka Jylla Meghalaya ka la ïoh pdiang shuh shuh ïa ka song pisa na ka bynta ar snem da kaba pynshong nongrim katkum ka kam. “Kane ka dei ka sakhi na ka bynta ka jingtrei shitom jong ka kynhun baroh kawei,” u la ong.
U Sangma u la ïathuh ba ka Jylla Meghalaya kan sa long kawei napdeng ki khyndiat tylli ki jylla ban kynjoh sha ka thong ba la buh ban pyndep ha u snem 2024 katkum ba la bthah da ka Sorkar India.
“Ngi la shim ka jingkithlieh ha lade ban pyndep ïa kamne ka prokram ha u snem 2022 hynrei namar ki jingïakynduh jingeh kiba bun ngim shym la lah ban pyndep watla ka jingbuh thong ka long tang 50 percent ba ngi la lah ban jop bad mynta nga kular ïa phi ba ka Jylla Meghalaya kan sa poi sha ka thong hapoh ka por ba la buh da ka Sorkar India,” u la bynrap.