Shen yn plie noh ïa ka Courtyard Marriott Hotel, kyrmen u CM ba kan kyntiew kam jngohkai pyrthei

Shillong, K’lyngkot 08: U Myntri Rangbah ka jylla u Conrad K Sangma ha ka sngi u Blei u la leit ban jurip ïa ka Courtyard Marriott Hotel kaba don ha Jail Road, Khyndai Lad ka hotel kaba heh tam ha ka jingdon ki kamra ha ka thaiñ shatei Lam Mihngi jong ka ri.
Haka jingleit jurip u Conrad u la ong ba kane ka Hotel kadei kaba heh tam lada ïa nujor ïa ka jingdon kamra bad u la ong ba u dap da ka jingkyrmen kaba skhem ba da ka jingplie ïa kane ka Hotel kan kyntiew ïa ka jylla haba ïadei bad ka jinglah ban pynbit pynbiang ïa kiba wan shangkai hapoh ka jylla ïa ki jingdonkam jong ki haba ïadei bad ki jaka sah.
“Nga sngew kmen ban ïohi ba ki jingtei ha kane ka Courtyard Marriott Hotel ki long kiba itynnad eh bad nga ngeit skhem ba ha ki khyndiat sngi yn lah ban plie noh ïa kane ka Hotel naka bynta ban pynbit pynbiang ïa ki nongwan shangkai pyrthei hapoh kane ka jylla” la ong u Myntri Rangbah.
U la ong ba ki kam ban pyndep noh ïa kane ka Hotel ka la ïaid shaid shaid bad ki dang sah satang ban pynbiang ïa ki kot ki sla bad hadien kane yn sa lah ban plie paidbah noh ïa kane ka Courtyard Marriott Hotel kaba la sahteng la bun bun phew snem.