Shillong, K’lyngkot 08: Hadien ka jingshah pynjulor ka ïingmane Katholik ha ka jylla Chattisgarh ha kane ka taïew kaba la dep sa kawei pat ka jingjia shah pynpra jong ki diengphna ha u lum jyntep jong ka Balang katholik ha ka jylla Maharsahtra ka la jia biang ha ka sngi Saitjaiñ mynta ka taïew.
Ha kane ka jingshah leh dusmon ka jaka tep ka la jia ha ka St Michael’s Church ha Mahim Maharastra.
Ha kane ka jingjia kumba 18 tylli ki diengphna ha ka jaka tep kiba la tep briew la bun bun snem mynshuwa ki la shah pynpait pynpra. Na ka liang ki pulit marmar ki la pynlong jingtohkit halor kane ka jingjia ban thwet ïa kiba don kti ban leh dusmon ïa kane ka jaka tep ïa ki riewngeit Katholik.
Na ka liang ki pulit ki la rejistar ïa ka ejahar halor kane ka jingjia hapoh ki kyndon ka Indian Penal Code Sections 295bad 447.
U Parish Priest jong ka Parish St Micahel’s u Fr Bernard Lancy Pintou la ong ba ka balang kan shim ïa ka jingkit khlieh ban maramot biang ïa kine ki deingphna ba shah pynjot dusmon.
U la ïathuh ruh ba na ki video ba paw lyngba ka CCTV Fottage kane ka jingjia la sakhi ba ka jia ha ka por 6 baje eiei jong ka step sngi Saitjaiñ.
Ki pulit jong ka Mumbai ki ïoh ban kem ïa u briew uba ki suba uba don kti ha kane ka kam leh dummon ïa uba la tip kyrteng kum u Dawood Ansari, 22 snem ka rta.
