Ba kim tip, ki kynthoh ba ngam ju kren ïa ki ishu jong ka Jaidbynriew ha Assembly

Shillong, K’Lyngkot 07 : U MLA ka Mylliem ba dang shu resaiñ shen, Bah Hamlet Dohling ha ka sngi Saitjaiñ u la ong ba ki don kiba kynthoh ïa u ha ki social media da kaba ong ba naduh ba u bat ïa ka shuki Minister um ju kren shuh ïa ki ishu jong ka Jaidbynriew hapoh Iing Dorbar Thawaiñ ka jylla.
“Nga kwah ban pynshai ba ha Iing Dorbar ki Minister kim ju lah ban kren kulmar hynrei ki hap ban kren beit tang ïa ka mat kaba dei ka jong ki hi. Ki dang mut ba wat hdien ba la long MLA long Minister dang lah ban leit kren biang ha Motphran ne hangno hangno ruh,” ong u Bah Hamlet haba kren ha ka jingïalang pynïasoh sha ka NPP kaba long ha madan Umlyngka.
Shuh shuhu ong ruh ba ha ki 12 snem kum u nongïalam ka KSU, u la ïakhun borbah ïa kiba bun ki ishu jong ka Jaidbynriew.
“Mynshwa ïa ka jingdawa Inner Line Permit ym u kren ha ka jingïalang jong ka Kynhun Myntri kumjuh ruh ïa ka ishu jong ka Ktien Khasi ne Garo bad ruh halor u pud u sam hynrei kane ka sorkar MDA ba nga don kum u Myntri Sorkar ngi la shimkhia bad ïa kren ïa kine,” u la bynrap shuh shuh.
Nalorkata, u ong ruh ba sngewkmen ba ha ki por ba u dang long kum u nongïalam ka KSU ïa ki mat jingeh jong ka Jaidbynriew ki ïoh ban kren tang ha ki jaka paidbah kum ha Jaïaw ne Motphrah hynrei da ka jingphah jong ki paidbah ka Mylliem Constituency u la ïoh ban kren matkhmat wat haduh hakhmat u Myntri Kampohiiing ka Ri, u Amit Shah ha ryngkat ka jingdonlang u Myntri Rangbah ka jylla.
“Lym da dei ba phi pynjop ïanga kum u MLA jongphi, ngam ym ïoh lad satia ban kren ïa ka ishu ILP lane ïa ka ishu khappud,” u la bynrap biang.
Na ka liang u Bah Hamlet u ong ruh ba ka nongrim kaba u ieng ban mih noh na ka PDF bad leit ïasoh sha ka NPP kadei namar u ïohi ba ha katei ka party ki don ki nongïalam kiba shemphang bad kiba lah ban wanrah bun ka jingkylla ïa ka jylla baroh kawei.
“Da ka jingdon lang jongnga bad ka NPP ngin pyntikna ba ka lama NPP kan ïoh ban kaweh ha baroh kawei ka jylla,” u la bynrap biang.
Ha kajuh ka por u la ai khublei ruh ïa ki nongthep vote jong ka Mylliem kiba la ailad ïa u ban long u MLA jong ki ha kine ki san snem. U la ong ruh ba khnang ba ki paidbah kin tip ba u la leh aiu ha kine ki san snem, kumta u la pynkhreh da ka kaiphod treikam kaba la batai lut kiei ki jait kam, kiei ki skim bad kiei ki kam pynroi kiba u la pynïoh bad sam sha ki 36 tylli ki shnong.
“Ngi don 36 tylli ki shnong ha ka constituency bad nga sngewkmen ban pyntip ba baroh kitei ki shnong nga la dep ban pynïoh ïa ki kam pynroi,” u la ong.
Baroh ki MLA ba poi sha ka jingïalang pdiang burom ïa u Bah Hamlet kynthup naduh u Myntri Rangbah, nangta u Bah Sniawbhalang Dhar, Kong Ampareen Lyngdoh ki la ai ka jingïaroh ïa ka jinglah jong utei u nongmihkhmat ban ai jingkheiñ sha u paidbah ïa ka jingtreikam.
Ïa katei ka kaiphod treikam la pyllait paidbah hi da u Conrad ryngkat ki heh ka NPP ha katei ka sngi ha ryngkat ka jingsakhi lang da ki hajar ngut ki nongkyrshan ka NPP.