Ka NPP ka ñiew ïa ka BJP kum ka Liang Pyrshah ha rilum Garo, kynnoh u State VP ka BJP

Kynnoh ba shim burom lut ïa ki skhim ba la bei ka Sorkar BJP

0

Shillong, K’lyngkot, 08: U State Vice President ka Bharatiya Janata Party (BJP) Meghalaya State Unit u Bernard N. Marak u la kynnoh ba ka National Poeples Party (NPP) ka ñiew ïa ka Bharatiya Janata Party (BJP) kum ka Liang Pyrshah ha rilum Garo.
“Ka BJP ka shah ñiew kum ka liang pyrshah ha ka NPP ha rilum Garo bad ki shim burom lut sha lade ïa baroh ki kam pynroi ba la bei pisa da ka Sorkar BJP na Delhi,” ong u Marak.
Ka Sorkar BJP hapoh ka jingïalam jong u Narendra Modi ka la pyllait ïa ka song pisa kaba T. 151.9 klur na ka bynta ka Hunar Skill Development Centre kaba kynthup ïa ka Nursing College bad ka hospital kaba don 300 tylli ki jingthiah, ka Pharmaceutical College, ka Paramedical College, ka Skill Development Centre bad ka hostel na ka bynta ki shynrang bad ki kynthei kiba ngiam kumba 1000 antan bad ka Working Women’s Hostel.
“Ka Sorkar u Modi kam shym la ïoh burom na kano kano ka projek ba la pyntrei ha ka jylla. Wat ïa ki flagship programs kum ka FOCUS, ka FOCUS+, ka NLM, ka YESS bad kiwei kiwei ki la kylla long pynban ki skhim ka NPP. Ka Jylla ka la rahbor ïa ka Hunar Skill Development projects na Tura sha Dalmagre bad hadien kata sha ka jaka ba kyndong hajan ka Chidekgre bad pyrshang ruh ban pynkylla kyrteng sha ka P.A.Sangma Skill Development Centre,” la kynnoh u Marak bad bynrap, “u Myntri Khynnah ka Sorkar Pdeng u John Barla da lade hi u la leit jurip ïa ka projek bad u la kyndit ban ïohi ba ka don tang ka jingpynkhuid bad ka jingthoh kyrteng. Ïa ka jingpynkylla kyrteng ïa ka projek la ujor da u Myntri Khynnah ka Sorkar Pdeng u John Barla namarba la leh khlem ka jingtip jong ka Sorkar Pdeng.”
“Sa kawei pat kaba kham pynlyngngoh ka long halor ka jingmynjur bad ki nongshong shnong/trai khyndew kiba ai sngewbha ïa ka jaka kaba heh 98 bigha ïa kaba ym pat shym la lah ban pyndep bad kaba la thikna ba kan sa buh ïa ki jyrwit jyrwat namar ka jingsuki jong ka projek kaba la pynbitar ruh ïa ki nongshong shnong,” u la ong.
“Ym shym la don kawei ruh ka projek ban ai burom ïa ka Sorkar Pdeng hapoh ka jingïalam jong u Narendra Modi,” la kynnoh u Marak.
“Wat ïa ka projek jong ka P.A.Sangma Stadium ba la mang pisa da ka ka Sorkar u Modi ym shym la pynpaw satia ha u mawnongrim hynrei baroh ka nam ka burom la shim hi da ka jylla. Wat ha ki dur ba la wah ha kylleng ka jylla da u Myntri Rangbah da kaba pynlut ïa ka pisa ka Sorkar la shu kdew tang shaphang ka skhim jong u Modi bad buh ruh ïa ka dur jong u Myntri Rangbah bad ki dur jong ki MLA ka NPP hynrei wat tang kawei ruh ka dur jong u Narendra Modi ym shym la buh satia. Kane ka pynpaw shai, ba baroh ki projek ki la shah rahbor,” u la kynnoh shuh shuh.
“Kine ki dei ki jingshisha ba ki paidbah ki dei ban buh jingkylli kumno u Myntri Rangbah u la put turoi lyngba kine ki jingthoh da kaba shim kabu ban ïohnam katba ïa ki kam baroh la wanrah dau Modi bad ruh khlem ka jingtip jong u? Ka Sorkar BJP ha Delhi ka tip bha ïa ki jingshisha bad ki Myntri ka Sorkar Pdeng ki ju wan khah khah ban pynshisha. Ki paidbah ki tip bha mano ba pynbiej ïano bad mano ba bei pisa ïa ka Sorkar ba la ïalam da ka NPP,” la kynthoh u Marak.

Leave A Reply

Your email address will not be published.