Shillong, K’Lyngkot 07 : U National President ka National People’s Party (NPP) ba dei ruh u Myntri Rangbah ka Jylla, Conrad K Sangma ha ka sngi Saitjaiñ u la ong ba da lei lei ruh ka party kan ym pdiang satia ïa ka Uniform Civil Code (UCC).
“Kum ka party, ngi tip shai ba ka UCC kadei kaei kaei kaba ngim lah satia ban pdiang da ka NPP,” ong u Conrad haba kren bad ki lad pathai khubor.
Ha kajuh ka por, u la ong pat ba katei ka UCC Bill kadei tang ka private member Bill bad kam dei satia ka Bill ba wanrah da ka sorkar. Katkum ka jingong jong u, ka UCC kan ktah jur bha ïa ka kolshor bad ka rukom im jong ki riewlum ha kane ka thaiñ shatei lam mihngi jong ka Ri khamtam eh ha ki jaidbynriew ba ai jait kmie kumba long ha Meghalaya.
“Tangba ïa mynta hi, ngim pat lah ban ong ei ei than khlem da ïohi shwa ïa ka Bill bad kaei kaba ka sorkar kan leh namar kane kadei tang ka Bill ba wanrah da u MP shimet ym da sorkar,” u la bynrap biang.
Ha kajuh ka por, u Myntri Rangbah u la kubur pat ba lada katei hi kan treikam, kan kylla lut ka kolshor bad ka jinglong tynrai wat ha kane ka jylla ruh bad dei na kata ka daw u ong ba kum ka jylla bad kum ka party hi kin ym lah satia ban pdiang ïa ka.
