Lah dep Pynbna bad pynthikna U CM ia ka District thymmai bad ka Headquarter ha Sohra

Sohra Kyllalyngkot 8 : U Myntri Rangbah duh ka Jylla, ha ka 5 tarik mynta u bnai u la pynbna paidbah bad pynthikna ba yn phiah noh ïa ka East Khasi Hills bad u la pynbna ba kata ka District thymmai ka dei ka thaiñ Sohra bad ba ka Sohra ka dei ka headquarter jong ka . Haba kren ha ka jingïakynduh bad ki dkhot ka Sohra District Demand Forum (SDDF) bad ruh khlieh Nongsynshar ka thaiñ Shella bad Sohra, u myntri Rangbah u la ong, “Sngewbha wat sngewthuh bakla bad nga pyntip shaphi ba kam don shuh kano kano ka jingartatien ba ka sorkar ka la shim ia ka rai ba ka headquarter kaba thymmai jong kane ka District kan dei beit ha Sohra”
U la batai ruh ba ka Sohra ka la biang lut ki jingdonkam naduh ki tnat sorkar bapher bapher bad ka dei hok ban bat kum ka Headquarter jong kane ka District thymmai. U la ong ba ka don ka jingkwah jong ka sorkar ban kynthup ïa ka Mawsynram bad ka Pynursla hynrei u la kren shai ba lada kine ar sub division kim treh ruh, ka District kan kynthup beit ïa ka Sohra bad Shella.
Ka la don ka jingbym sngewthuh shai na ka liang jong ki dkhot ka SDDF bad Khlieh Nongsynshar namar haba sdang u Myntri rangbah u la batai shaphang bun kiei kiei kiba ïadei bad ka jingpynbit pynbiang ïa kane ka district thymmai hynrei hadien u la kren shai ba ka rai jong ka sorkar ka long kaba shai ba ka East Khasi hilla ka la heh palat bad la donkam ban pynsting ïa ka bad ba ka rai kaba shai ka dei ban phiah ïa ka District thymmai bad ym don jingartatien shuh ba ka headquarter kan dei beit ha Sohra.
Da kane ka jingpynbna, ka jylla mynta kan don 13 tylli ki District bad la khmih lynti ba ha une u snem yn plie noh ia ka. La khmih lynti ba ryngkat bad ka Sohra, yn plie ruh sa kawei ka District kaba thymmai kaba dei sha Garo Hills.