Duh thiah duh dem ka sorkar MDA tang ban ïoh plie ïa ki Project bym pat pyndep : Dr Mukul

0

Shillong, Kyllalyngkot 8 : U Nongïalam ka Liang Pyrshah bad u Myntri Rangbah ba rim ka jylla u Dr Mukul Sangma u la ther tyngeh ïa ka sorkar MDA hapoh ka jingïalam ka NPP ba ki bunkam bad duh thiah duh dem tang ban ïoh plie ïa ki projek ki bym pat pyndep kumba la leh iaka Ganol Hydro Electrict Power Project, Garo Hills.
“ Ki la duh thiah duh dem namar ki kwah tang ban plie ïaki projek ki bym pat pyndep hapoh ka jylla” ong u Dr Mukul.
U la ïathuh ba la pyntip ïa u ba ïa ka Garo Hydro Electrict Power Project ym pat pyndep bad ym pat lah banpyntreikam ïa ka hynrei la dep plie pat mynta.
U Dr Mukul u la ong ka sorkar ka la dei ban da bishar bniah bha shwa ban plie ïa kano kano ka project khamtam ka Hydro Power Project namar hap ban ïaid kat kum ki kyndon jongka Central Electricity Authority (CEA).
“ Ki don bun ki kyndon, ki SOP kumta kam long kaba dei ban shu ïa plie kulmar, balei ki leh kyrkieh.. Ban pynsted ia ka kam ka ïapher ban ïa ka jingkyrkieh ban plie ïa ki projek” ong u Dr Mukul.
Halor ka jingkynnoh ba pynkylla kyrteng ïa ki prokram bad projek da kane ka sorkar MDA u Dr Mukul u la ong ka don ka lynti na ka bynta ban jer kyrteng thymmai ïa ki shnong ki thaw ne ïa kino kino ki projek jongka sorkar ba kynthup ïaki jaka puta ne surok ruh. Hooid ula ong ba um don kano kano ka jingpyrshah ban jer kyrteng ïa kano kano ka projek ha ka kyrteng jong ki riew paw khmat ne ki nongïalam.
“ Ngam don kano kano ka jingpyrshah ïa kaba ngi la ju leh hi hynrei haba la don lypa ka kyrteng kaba la jer kat kum ka jingkwah jongki paidbah te balei ki dang kwah ban pynkylla ïa kata” kylli u Dr Mukul.
Haba kren halor kane u mut halor ka Dikki Bandi Stadium ha Tura kaba la dep jer kyrteng ha ka por u Dr Mukul tangba kane ka kyrteng kam dei kaba la ai da ma u hynrei ka dei kaba la wan bad ai jingmut da ki paidbah.
Halor ka jingpynkylla kyrteng sha ka PA Sangma Stadium, u la ong “ Phi lah ban tei da kawei pat ka stadium bad jer ha ka kyrteng PA Sangma Stadium namar donkam bun tylli ki stadium ym tang kawei lane ar ne lai. Kumta kane ka jingjer kyrteng thymmai ka dei kaba la pyndonkam bakla ïa ka bor bad kaba ym dei kumba la khmih lynti da ki paidbah”.
U la ong ha ka jingshisha ka Meghalaya ka dei ban pynlong ïa ka National Games ha u 2022 ban rakhe artat ïa ka jingdap 50 snem ka jylla hynrei kaei kaba la jia? Lah pynlong? katba ka pisa lah dep mang na ka bynta ban shna ïa ki madan bad ïa baroh ki jingdonkam na ka bynta ka National Games. Kiwei kiwei ki projek ki lajan dep na ka bynta ban pyndonkam lait noh ka Stadium kaba la jer kyrteng ha u PA Sangma kaba la shu plie kyrkieh khlem pat da pyndep.
“ U la ong ha kato ka sngi haba nga la ïohi ba don jingker nga la sangehb ad kylli kaei kaba la jia, la jubab ba la dep plie ïa kane ka stadium. Tangba ka kam ym pat dep la shu plie la ka plie kumto” ong biang u Dr Mukul.
“ Nalor kane ïathuh ïa nga sa kiei ki projek kiba ym pat lah ban pyndep kiba la pynkhreh na ka bynta ka National Games. Ki don ar tylli ki Indor Stadium ba la mang 30 klur ha ki ar jaka. ïa kine tang ka kam ruh ym pat sdang. Balei yn dang mang na ka Tide Fund haba ka la don lypa ka pisa ba la mang na ka bynta kine ki projek. Balei kim pat sdang hato kine kim dei kiba donkam na ka bynta ka lawei ki khun samla jonga jylla.
U la ong ba kine baroh ki dei ki projek kiba la pynkhreh da ka sorkar ba mynshwa hapoh ka jingïalam jongu bad ka pisa ruh la dep mang baroh namar la dep rai na ka bynta ka National Games 2022.
U la kynnoh wat ïa ka SICPAC ruh la dep plie ïa kaba ym pat dep lut nadong shadong. “ Mynta haba la plie ngi kwah ban pyndonkam hynrei ki jubab em ym pat dep lada kumta balei pat ki plie.
Ha kaba ïadei bad ka projek ha Ampati, kaba la buh mawnongrim da u Myntri Rangbah duh ka ri, u Dr Mukul u la ong ba ka sorkar MDA ka khlem burom ïa u myntri rangbah namar kane ka stadium haduh mynta kam pat dep satia. Kane ka long kaei kaei kaba ym lah ban pdiang namar ki pyrshang ban pynsahteng khnang ïa kane tang namar ba ka dei ka Constituency jong kiwei. ïa kum kane ka jingleh ym shym la khmih lynti na ka sorkar. Namar ka kamram jongka sorkar ka long ban wanrah ïa ki jingroi jingpar ha baroh kawei ka jylla.

Leave A Reply

Your email address will not be published.