Shillong, K’lyngkot 09: U MP ka Shillong, u Bah Vincent H. Pala, u la thoh da ka shithi sha u Myntri Rangbah duh ka ri, u Narendra Modi ban ujor halor ka jingpynmih ka tnad Special Branch jong ki Pulit Assam ïa ka jingthoh ban wad jingtip shaphang ki Khristan kiba don ha katei ka jylla.
Ha kane ka shithi, u Bah Pala, u la ong ba ka Riti Synshar jong ka ri India ka la ailad ïa baroh ki nongshongshong ban mane laitluid ne ban bud ïa kano kano ka niam bad kane kadei ka hok jong ki. Kumta kane ka jingpynmih shithi da ka tnad Pulit jong ka Assam, ka long kaba beaiñ bad kaba long pyrshah ïa ka riti synshar jong ka ri.
U President jong ka Meghalaya Pradesh Congress Committee (MPCC) u la ong ruh ba kane ka jingwad jingtip bad ka jingshim jingkheiñ ïa ki Balang bad ki ïingmane Khristan ka long ka jingleh shiliang bad ka jingñion beiñ ïa ki Khristan ha Assam bad ban pynbudnam ïa ki.
“Kaba kum kane ka jingpynbna da ki Pulit Assam ka long ka jingpynkheiñ ïa ka jinglong salonsar jong ka ri India kaba dei ka tynrai treikam jong ka riti synshar ka ri India”, la ong u Bah Pala.
Kumta na ka liang jong u, u la kyntu ïa u Myntri Rangbah Duh ba un tuklar mardor namar ba kadei ka jingleh shiliang ïa ka kynhun niam kaba ieit ïa ka jingsuk bad kaba shakri ïa ka imlang sahlang ha ka jingjar jar.
