Shillong, K’lyngkot 09: U President jong ka Hynñiewtrep Integrated Territorial Organization (HITO) u Bah Donbok Dkhar ha ka sngi Nyngkong u la ther tyngeh ïa ka jingkynnoh u nongïalam ka NPP uba dei ruh u Myntri Sorkar u bah Sñawbhalang Dhar uba la kynthah ba ki seng bhakang lei kim dei kiba ieid jaidbynriew shisha kumba ieid ma u bad ki para MLA ba u paidbah u la pynkhmati ruh ban long nongïalam.
“Nga kwah ban kren da kaba shai Bah Shñiawbha mem dei u nongïalam jong ngi hynrei me dei u nonglilam ïa ngi. Lada mem dei shisha u nongïalam balei me jop tang lai seat na Jaintia Hills,” bad u la bynrap, “lada me dei u nongïalam me dei u nongïalam siat bom sat khmat ïa ki nonghikai, u nongïalam pynïap briew ha ka por shiteng synïa ym palat ïa kata,” ong u Bah Donbok.
U la ong ruh ba ka jingkynthah u Bah Shñiawbha halor ki seng bhalang ha ka jingïalang NPP ha ka sngi kaba uwei na ki nongïalam seng bhalang barim u pynïasoh sha ka NPP ka long kaba kyndit ban ïohi ba u shu sngap jar.
“Ngi kyndit ba ïohi ba katto u kren jot ïa ki seng bhalang hynrei uwei na ki nongïalam seng bhalang ba rung sha ka NPP ha kato ka sngi u sngap beit jar khlem kren ne pynphai nia eiei bad ka long ruh kaba sngewsih hi ba u nongïalam ba ngi peit sha u kum u nongïalam ha ki por ba la leit un shu sngap beit jar kat katro ka jingkren beiñ,” u la ong
