Shillong, K’Lyngkot 09 : Ka United Democratic Party (UDP) ha ka sngi Nyngkong ka la sei da u John Leslee Sangma kum u kyrtong ban ïakhun pyrshah ïa u Myntri Rangbah ka Jylla, Conrad K Sangma na South Tura ha ka elekshon MLA kaban sa long shen.
Nalor u John Leslee, ka party ka la pynbna ruh ïa ka kyrteng jong ka Dr. Pilne Sangma ban aireng na North Tura. Kumba long mynta ka UDP ka la dep ban pynbna haduh 34 ngut ki kyrtong kiban aireng ha kane ka elekshon.
Ïa kitei ki arngut ki kyrtong la pynbna da u President rangbah ka party, Bah Metbah Lyngdoh ba dei ruh u Lamphang ka Iing Dorbar Thawaiñ ka jylla.
Kumban shu kdew hangne, u John Leslee udei u MLA barim katei ka thaiñ katba ka Dr. Pilne kadei kaba la aireng teng ha ka elekshon MDC ha GHADC tangba ka khlem poi sha ka thong. Tad haduh mynta, dei tang ma ka marwei ka kyrtong kynthei jong ka UDP.
Haba kren bad ki lad pathai khubor hadien ba la pdiang burom ïa kitei ki kyrtong, u Bah Metbah u la pyntip ruh ba ka party shen kan sa pyllait sa ïa ka thup kyrteng kaba lai kaban kynthup ruh ïa san ngut ki MLA ba mynta kiba dei na ki party bapher bapher.
U Bah Metbah u la ong ruh ba ïa mynta ki paidbah ki phaikhmat lut sha ka UDP kum ka party riewlum kaba heh tam ha ka jylla ban peit ïa ka ishu bad ka jingeh jong ki paidbah.
