Shillong, K’Lyngkot : U nongïalam ka BJP uba dei ruh u MDC ka Tura u Bernard Marak ha ka sngi Nyngkong u la kynnoh ba u Myntri Rangbah Conrad K Sangma u la pyndonkam ïa ka skim YESS ban pynkhlaiñ ïa ka seng ki samla NPP.
“Ha Garo Hills, ki samla ba dei hok ki la shah knieh ïa ka skim YESS. Ka 1,00,000/- kaba dei ban ai sha ki samla hapoh ka skim YESS ban pynkupbor ïa ki samla la sam noh sha ki samla NPP,” kynnoh u Bernard ha ka kyrwoh
U ong ruh ba la phah ïa ki samla NPP ban thaw ïa ki klob ha kaba ki bor sorkar ki ïarap ban register ïa ki ha ka sngi Saitjaiñ ba la dep bad phah plie account ha rural Bank ha kaba yn sa phah ïa ka pisa ba 1,00,000 tyngka.
“Ïa kane ka pisa yn sa pyndonkam ban khring vote ha ka por elekshon. Ïa ki klob kiba dei hok bad ki seng ba la rejistar ym shym la pyntip ïa kane ka skim,” u la kynnoh.
Nalorkata u ong ruh ba ka sorkar ba ïalam da ka NPP ka la knieh ïa ka hok jong ki samla ba dei hok ban ïoh bad kumjuh kito ki seng ba la dep rejistar ïa katei ka skim YESS.
