Shillong, K’lyngkot 09: Ka Lay-By Market lane ka iew nongrep ha Mawkdok kan kyntiew ym tang ia ka ioh ka kot ki nongrep lyngba ka jingdie ia ki mar rep hynrei kan khring ia ki nongwan jngohkai pyrthei kiba hiar sha Sohra ban rung ha katei ka ïew namar ka jingbiang ka jaka ba la tei ïa ka iew khamtam ka jingbiang ka jaka ïeng kali.
Hynrei jar la katta ka shong pat ha ki nongshong iew ha ka katei ka jaka kumno ban pyni ne sei ia ki mar rep kiba lah ban khring ia ki nongwan jngohkai nalor ka lehkhuid lehsuba da ka jingïatreilang ryngkat bad ka Market Committee kaba pyniaid ia katei ka iew.
La plie ia kane ka iew ha 09 tarik u Kyllalyngkot, 2023 da u Bah Banteidor Lyngdoh, Myntri ka tnad kam rep ka Sorkar Jylla ha ryngkat ka jingiadonlang u Bah Gavin M Mylliem, MLA ka Sohra, ki ophisar ba kynthup ia ka Kong D Sohtun, Director ka tnad Horticulture, Kong B Mylliengap, Dy Director, Bah KB Lakiang, DHO East Khasi Hills, u Bah W Nongrum, Sordar, ki nongrep lem ki nongshong shnong.
Ia kane ka iew la tei ha ka jinglut kaba 84 lak tyngka ha ka jaka ka tnad PWD (Roads) bad kala shim por ban plie ia ka namar ka jingbym pat lah ban pynbiang ia ki jingdonkam ba kongsan kum ka bor ding elektrik bad ka um watla la dep tei ia ka ha u snem 2019.
Haba kren ha ka jingïalang, u Bah Banteidor da kaba ai khublei ia ka jingshimkhia u MLA ka Sohra ban pynurlong ia katei ka iew, u la ong ba kumba ka thaiñ Sohra ka khring ia ki nongwan jngohkai pyrthei kumta ruh ki nongshong iew ki dei ban shim kabu ban khring ia ki sha katei ka iew khnang ba kan nang kyntiew ia ka ioh ka kot.
“Nga kyntu ia ki nongshong iew ki ban ioh basa ha kane ka iew ban don ka jingïatreilang bad ka Market Committee kata ban pynneh ia ka khuid ka suba ban khring pat ia ki nongwan iew”, u la ong da kaba bynrap ba ka tnad Horticulture ka wanrah ia kane ka iew na ka bynta ki paidbah nongrep ka thaiñ.
Na ka liang u Bah Gavin u la ong ba ka jingïatreilang ka dei kaba kongsan na ka bynta kino kino ki kam. “Kane ka iew ka la kynduh ki sohkyrdot bad hynrei la lah ban law ia ki ban pynlong ia ka ha kane ka dur kaba long mynta”, la ong u Bah Gavin uba la kyntu ia ka Market Committee bad ki nongshong iew ban sumar pynkhuid ban pynneh ia ka jingitynnad jong ka.
