Ujor ki longkmie ba sei pisa u Phriden bad Rojen na bank khlem jingtip jong ki

Shillong, K’ Lyngkot 12: Ka khubor ba la ïoh na ki pulit la ïathuh ba u Bah David Kharsati u la phah ka jingujor ba uwei uba kyrteng u Anand Chhetri, uba dei u nongmihkhmat ba la ïoh bor napoh kawei ka firm kaba kyrteng ka M/s Aimil Pharmaceutical, u la rah ïa ki tiar kiba la shongdor kumba T. 2,13,265/- napoh ka firm jong u bad u khlem lah shuh ban siew biang wat hapdeng kiba bun ki jingpynkynmaw.
Ha kawei pat ka jingjia, ka kong Klian Khyllait, kong Bitinora Kharthangmaw bad ka kong Iaidrit Kharthangmaw ha ka 8 tarik mynta u bnai ki la ujor hapoh Sohïong OP (EKH) pyrshah ïa u Bah Phriden Sing Thabah bad u Bah Rojen Khyllait ba ki la pynbeij ïa ki ban ai ïa ki blank cheque ba la soi ban sei kumba 10% ka pisa napoh ki Bank account jong ki, da kaba ai daw ba ki la ïarap ïa ki ban pynïoh ïa ka bai lutksan ka bai jaka ha kaba ïadei bad ka jingshna ïa ka surok jong ka Shillong Western Bypass.
Hadien pat kitei ki longkmie kiba la ujor ki la lap ba kitei ki arngut ki rangbah ki la sei shibun ka pisa napoh ki Bank account jong ki, khlem ka jingtip jong ki.
Shuh shuh ha kawei pat ka jingjia, ki pulit ki la ïathuh ba ha ka 8 tarik mynta u bnai ha ka por kumba 9 baje mynmiet, ki runar bym lah ban ithuh ki la shoh ïa u Bah Kenny Jyrwa ba la 29 snem ka rta ha Rilbong Laban, Shillong. Halor kane ka jingjia utei u lanot u la mynsaw bad la pynkitnoh sha Civil Hospital Shillong na ka bynta ban ïoh ki lad jingsumar.