Lap ka CAG ba siew palat pud ka KHADC sha ki arngut ki kontraktor ba tei ophis bad ka TCC ha Umiam

Shillong, K’lyngkot 12 : Ka Comptroller & Auditor General (CAG) ka la lap ba ka Khasi Hills Autonomous District Council (KHADC) ka la siew palat pud kaba la long be-aiñ ïa ka jingsiew lypa ne ka Mobilisation Advance (MA) ba kot haduh T.10.80 klur sha ki arngut ki Contractor.
Ka Audit kala shem ba ïa kane ka jingsiew la leh hapdeng u Naitung 2018 bad Naiwieng 2019 sha ki arngut ki contractor-K Warbah (Sl No 1 Contractor) na ka bynta ka jingtei ïa ka ka ïing Ophis ka KHADC ha Shillong ba T.500 lak bad ïa ka M/s Rodeka Enterprise (SL No 2 Contractor) ban tei ïa ka Traditional Cultural Centre (TCC) ha Umiam, Jingkieng Kalong ba T.580 lak.
“La iohi ba u Contractor K Warbah ula ïoh ïa ka jingsiew lypa (advance) ba kot haduh T. 5 klur kaba long 67% na ka work order kaba kot T.750 klur. ïa ka M/s Rodeka Enterprise la siew T.5.80 klur kaba long 77% na ka work order ba T.7.50 klur ha ki hynriew tylli ki installment” kala ong.
Ka Audit ka shem ba ka jingsiew lypa ïa kine ki arngut ki contractor ka dei kaba la leh khlem da don wat tang ka bank guarantee bond ruh.
“Nalor kata, ym shym la shem ruh ban don ka aplikeshon da ka jingthoh na ki contractor ba pan ïa ka jingsiew lypa ne ka Mobilisation Advance” ong ka CAG. Kala ong ruh ba ka jingpynbeit ïa kane ka jingsiew lypa la leh ruh khlem da kheiñ ïa ka sut ba dei ïoh kaba kot haduh T.1.98 klur.
“Namar kata, ka KHADC ym tang ba kala leh bakla ha kaba ai ïa kane ka jingsiew lypa khlem ka jingkyrpad da ka jingthoh na ki contractor bad ïateh ïa ka bank gurantee bond hynrei kala bakla ruh ha ka jingduh ei ïa ka sut kaba kot T.1.98 klur, kaba lam sha ka jingai jingmyntoi sha ki contractor haduh utei u pud” kala ong.
U Superintendent Engineer ka KHADC ha ka jubab ha u Risaw 2023, haba pdiang ïa ka jingshem jong ka Audit, ula pynpaw ba ïa kum kine ki rukom siew yn sa kiar noh hadien habud bad tang 15% ka jingsiew lypa (advance) la kynthup ha ka tender agreement ba thymmai kaba la dep mynjur da ka EC.