Ujor ka AHAM bad OFCSA ba shah dawa pisa jubor ki nongrep ha NGHD

Shillong, K’ Lyngkot 17: Ka A·chik Holistic Awakening Movement (AHAM) bad ka Organic Farmer Cooperative Society Adokgre (AHAM and OFCSA) ka la thoh sha u Deputy Commissioner of North Garo Hills ban pynpaw ïa ka jingpyrshah haba ïadei bad ka jingdawa pisa jubor kaba la leh pyrshah ïa kito kiba donkti ha ki kam khaïi kwai bad ki seij.
Ki nongkhaïi bad ki nongrep hadien ba ki la pynmih ïa la ki jong ki jingthung ki la hap ban ngat ha ki jingshah dawa pisa ha kiba bun ki jaka ba don ki khyrdop talasi ne ki checkpoint, bad la ong ba dei halor kane ba ka la pynlong ïa ka jingkiew dor ki mar ki mata, ka jingduna ha ka jingïoh jingmyntoi bad ka la pynduh mynsiem ruh ïa ki nongrep ba kin bteng ïa kane ka kam rep jong ki, ong ka shithi jingujor.
Kane ka jingujor kam shym la pynthikna ne ïathuh halor ka jingtip ïa kine ki briew kiba dawa pisa jubor hynrei ka la ïathuh ba ki dei tang ki riew shimet bad ka kynhun jong ki runar.
Na ka liang kine ki seng ki la ai jingmut ba dei ban thaw noh da ka taskforce ban peit ïa kine ki jingeh bad kumjuh ruh ban buh ïa ka helpline ha kaba ki lanot kiba ngat ha kane ka jingshah dawa pisa jubor kin lah ban ujor bei beit bad da kaba sted sha ki bor ba dei peit.