Na Jowai North yn ïakhun elekshon MDC u Bah K.L. Pariat kum u kyrtong shimet

Jowai, K’Lyngkot, 17: U Bah Khroo Lamsalanki Pariat uwei na ki rangbah ka sor Jowai uba shong basah ha Tympang Ïawmusiang Jowai, ha ka sngi Thohdieng da kawei ka jingmut ula shim ïa ka rai ban ïakhun ha ka elekshon MDC sha ka JHADC ka ban sa long ha ka 21 tarik Rymphang, 2025.
Katkum ka jingïathuh jong u Bah Khroo sha ki lad pathai khubor ula ong ba ka por ka la biang ïa u ban shim ïa kane ka jingkitkhlieh ban shakri paidbah ban ïakhun kum u kyrtong shimet na Jowai North Constituency.
Ki jingthmu kiba hakhmat eh jong u ban trei haba u poi sha ka thong ki kynthup ïa ka jingpynbha ïa ka riti ka dustur (ka shongkha shongman bad ka hiar pateng), ban pynskhem ïa ka jinglong trai ri trai muluk, ban pynskhem ïa ka khyndew ka shyiap, ki um ki wah, ka khih ka kamai, ban pynkiew ïa ka jingnang jingstad nalor kiwei de.
U Bah Khroo u ong ba ki don ki party heh ba kynthup ïa ka Congress bad ka BJP kiba la tyrwa ïa u ban ïakhun hynrei u kyntait mardor namarba u kwah ban ïeng da ka mon jong ki paidbah.
U khot bad kyntu ïa ki paidbah jong ka Jowai North Constituency bad ki nongshong shnong ka Ri-lum Jaiñtia ban long kiba stad ban jied ïa ki nongmihkhmat kiba don ka jingkitkhlieh ïa ka ri bad ka jaitbynriew.
Kum ban shu pynkynmaw ba u Bah Khroo Pariat u don bynta ban trei ha ki kam paidbah bad ha ka imlang ka sahlang. U long u nongïalam jong ki nongtrei Muster Roll, ki nongbylla sngi, kynthup ïa ki Mid Day Meal Cook jong ki skul bapher bapher. U long u nongïalam ba hakhmat ha kaba ïadei bad ka jingwanrah ïa ka khuid ka suba jong ka wah Myntdu, kumjuh ka jingpynbor ïa ka JHADC ban don ka jingithuh noh ïa ki Kur bapher bapher kiba don hapoh u pud u sam jong ka.