Shillong, K’ Lyngkot 17: Ka khubor ba la ïoh na ki pulit la ïathuh ba uwei u nongshong shnong jong ka Nongbah Shillong u la phah ka jingujor ba ha ka 6 tarik mynta u bnai ha ka por kumba 7 baje mynmiet, u la ïohpdiang ïa kiba bun ki jingshah phone ha kaba une uba phone u la kam ïalade ba u dei uwei na ki paralok hapoh ka ïing ka sem jong u bad u la thok ka pisa kumba T. 2,98,669.
Ha kawei pat ka jingjia, ki pulit ki la ïathuh ba u Bah Bording Khyllait u la phah ka jingujor ba ha ka step jong ka 13 tarik mynta u bnai, u la shem ba artylli ki masi ki la jah hapoh ka sem masi kaba ha shnong Lawkynter Laitdom (EWKH). Halor kane ha ka por 8 baje mynmiet, utei uba la ujor ha ryngkatlang bad kiwei pat ki lai ngut ki la ïoh bat ïa u Phastar Rngaid, u Phikstar Rngaid bad u Bastarwell Nongphud ha kawei ka local taxi ha ka thaiñ Mawpun ha kaba la lap ruh kawei ka masi kaba la jah kaba la teh da u tyllai. Ha kane ka jingjia uwei na kitei ki 3 ngut u la lait phet.
Ki pulit ki la ïathuh ruh ba ka Handaka H Lhuid ka la phah ka jingujor ba ha ka miet jong ka 13 tarik mynta u bnai, ki runar bym lah ban ithuh ki la tuh ïa ka scooter jong ka, kaba don u nombar ML-05D-7844 napoh ka shnong Ïalong, Jowai (WJH).
