Ujor ejahar ka shnong Mawkyrdep pyrshah ïa u bar jylla ba pyndonkam bakla ïa ka kyrteng shnong

Nongpoh, Naiwieng 04: Ka Dorbar Shnong Mawkyrdep ba hap ha Raid Madan Kyrdem, Ri-Bhoi District ka la ujor syndon da ka ejahar pyrshah ïa uwei u bar jylla u ba la shim bad pyndonkam bakla ïa ka kyrteng shnong ban buh ïa ka ophis treikam ha katei ka shnong khlem ka jingïoh jingbit naka Dorbar Shnong.
Haba kren sha ki lad pathai khubor naka liang u Bah Jibansius Ramshon Rangbah Shnong ka shnong Mawkyrdep u la ong ba kum ka Dorbar Shnong ka dap da ka jingsngewkhia kaba jur halor ka jingshim kabu jong utei u bar jylla u ba la tip kyrteng kum u Samson Prakash u ba dei u Founder bad Board Adviser jong ka kawei ka kompani kaba u la ai kyrteng Jingkyrmen da kaba ai ruh ha ka kyrteng ka shnong Mawkyrdep khlem da ïoh jingbit naka shnong.
Halor katei ka bynta naka liang u Bah Jibansius kum u Rangbah shnong u la ong ba kum ki bor pynïaid shnong ki pyrshah jur ïa ka jingshim kabu une u bar jylla u ba la nud ban shu wan buh ïa ka jaka treikam khlem da ka ïaid katkum ki kyndon bad khlem kano kano ka jingbit ne ka jingaibor naka liang ka shnong, kumta ka shnong kam banse ban ujor syndon da ka ejahar pyrshah ïa utei u bar jylla bad kyrpad ruh ïa ki bor pulit ban pynshitom katkum ki kyndon aiñ.