Nongpoh, Nailar 26: Kiba bun naki paidbah haka thaiñ Umden Nongtluh bad kiwei kiwei ki shnong ba mar khap kila pynpaw ka jingsngewkhia halor ka jingthud palat ka network mobile ha kine ki khyndiat sngi ba kynthup ïaka network Jio bad Airtel kaba la buh ïaki paidbah hapdeng ka jingeh kaba khraw.
Kiba bun naki paidbah kila pynpaw ba kim ioh shuh ban pyndep ïaki kam ki jam, ki jingpyntip ba kyrkieh bad ruh ha kaba ïadei bad ki kam ha Bank namar ka Bank Nongkyndong kaba don ha katei ka thaiñ kam shym la lah ban treikam ha kine ki sngi namar ka jingbym don network, watla u tower u don ha katei ka jaka.
Namarkata naka liang ki paidbah jong bun tylli ki shnong ha katei ka thaiñ kila kyrpad ïaki bor ba dei peit jong ka kompani Jio bad Airtel ba kin pynbiang mardor ïaka network ha katei ka thaiñ naka bynta ka jingbit jingbiang jong ki paidbah, khamtam ban pyndep ïaki kam ki jam,la ka dei ha Bank bad ruh ka jingdonkam jong ki khynnah pule kiba pynkhreh ïaki jingpule lyngba ka internet.
