Shillong, Nailar 26 : Ka Kynhun Myntri ka Sorkar Jylla ha ka Sngi Balang ka la ai jingmynjur ban ai jaka na ka bynta ban tei ia ka Ophis Deputy Commissioner (DC) jongka South West Khasi Hills ha Mawkyrwat.
U Myntri Rangbah Conrad K Sangma u ïathuh ba ka pisa na ka bynta ka jaka la dep ban pyllait sha ki district ba pynkha thymmai ha kine ki 11-12 snem ba la leit, hynrei ka Mawkyrwat bad ka Resubelpara kim pat shym la pyndonkam ïa ka.
“Ka pisa kala shu sah bad ki la 10 snem mynta. Ha kane ka shisnem ba la leit, ngi la mynjur ïa ka jaka na ka bynta ka Resubelpara” ong u Conrad hadien ka jingïalang ka Kynhun Myntri.
U iathuh ba ïa ki kam ba dei ban leh na ka bynta ka Mawkyrwat la leh ha ka kyrdan u Deputy Commissioner lyngba ka Expression of Interest, ka jingleit jurip ïa ka jaka bad ka jingaiti ïa ka jingtyrwa.
“Artylli ki jingtyrwa la phah sha ngi. Ka Tnad GAD kala bthah ïa u DC ban jied ïa kawei ka jaka. Halor kane, u DC ula tyrwa ïa ka jaka ha Mawten, kaba heh kumba 15 acre, kaba jngai ruh tang 6 km na ka district headquarter, kaba shongdor 2.19 klur tyngka. Ka pisa kala don bad u DC bad la pynthikna ïa kane ka jaka na ka bynta ka Ophis DC ha Mawkyrwat” ong u Conrad.
