Jowai, Nailar 26: Ka District Legal Services Authority (DLSA), West Jaiñtia Hills District, ka la pynlong ïa ka prokram pynsngewthuh paidbah ne ka Awareness Campaign-cum-Poster Painting halor ka phang “Ragging” under the NALSA JAGRITI Scheme, 2025, ryngkat ka phang pdeng “Empowered Youth, Stronger India.”
Ïa kane ka prokram la pynlong ha ka 21 tarik u Nailar, 2026 ha ka jaka ri khunswet jong ka North East India Mission Association (NEIMA) Orphanage Children Home, kaba don ha shnong Sahsniang, West Jaiñtia Hills District.
Ha kane ka prokram u bah F.B. Passah, uba dei u Assistant Legal Aid Defense Counsel ula ai ïa ka jingkren halor ka phang jong ka jingpynshrai (Ragging) bad kdew ïa ki jingma ba mih na kane, ula batai ruh ïa ka jingdonkam ban bat ïa ka jingshngaiñ bad ka jingburom na ka bynta ki khynnah skul bad ki samla.
Hadien ka prokram jong ka jinghikai pynsngewthuh la don pat sha ka jingïalehkai dro jingdro (poster-painting), ha kaba ki khynnah kila ïashim bynta shitrhem bad kila pynpaw ïa ka jingsngewthuh halor ka phang ‘Ragging’ lyngba ki jingïalehkai.
Haba pynkut jong ka prokram la don ka jingsam ïa ki khusnam sha ki nongjop ha kine ki jingïashim bynta.
