U Tirot Sing ym dei tang u Nongïaleh laitluid,. hynrei u Nongmuna ruh ïa ki Riewshlur : CM

By Mawphor News Desk On Jul 18, 2023

Shillong, Naitung : U Myntri Rangbah ka jylla u Conrad K Sangma hynne ka sngi Nyngkong u la leit ban ïashim bynta ha ka jingrakhe ïa ka lyngkhuh sngi ïap kaba 188 jong u khla wait ka jaidbynriew u Syiem Tirot Sing ha ka jingïalang kaba iaphuh ipheign hapoh madan Tirot Sing ha Mairang.
Nalor u Myntri Rangbah ka jylla ha kane ka prokram la ïa don lang ruh u Bah Phrestar Manik Syiem, Syiem ka Hima Nongkhlaw, u Bah K.M. Syiem, Deputy Syiem Hima Nongkhlaw, Bah Pyniaidsing Syiem, Chief Executive Member, Khasi Hills Autonomous District, Metbah Lyngdoh, MLA bad Chairman State Planning nalor kiwei pat kiba la leh burom na ka bynta utei u khlawait ka ri.
Na ka liang u Conrad Sangma u la pynlong ruh ka jingleit jngoh sha Nongkhlaw kaba dei ka jaka ha kaba la kha ïa u Syiem Tirot Sing hapoh Eastern West Khasi Hills ha kaba u la ïoh ban ïamir jingmut bad ki dkhot nongshong shnong jong kane ka thain kaba la pynmih ïa une u nongialam bashlur.
Ki nongshong shnong ka thain ki la rakhe ïa kane ka sngi ba kyrpang jong une u nongïalam lyngba ka jingpynlong ïa ki prokram bapher bapher, kata kum ki jingrwai bad ki jingtem jingput bad jingshad tynrai ïa kaba la pyrto da baroh ki nongwan ïashim bynta. Na ka liang ka ophis jong u Syiem ka Hima Nongkhlaw ruh lyngba ka jingïarap na ka sorkar Meghalaya ka la lah ban pynlong ïa kane ka prokram kaba jop.
Haba aijingkren kum u Kongsan ha ka jingïalang u Conrad Sangma u la pynpaw halor ka jingkut jingmut jong ka sorkar ban pynneh pynsah ïa ka histori bad ïa ka kolshor jong ka jylla Meghalaya.U la ong ruh; “Ka long ka burom kaba khraw ban ioh ia ka lad ban ïa don ryngkat lang ha kane ka jingrakhe ïa ka lyngkhuh sngi iap jong u Tirot Sing uba dei da shisha u riewshlur. U Tirot Singh um dei satia tang u riewialeh laitluid hynrei ruh u long ka shap jong ka jingshlur ban ïa aireng ïa ka jingsynshar jong ki dohlieh ne ki British.”Nga kyntu ïa ki samla bad ki khynnah pule hapdeng jong ngi ban shim ïa ki nuksa jong une u nongialam bad ruh ban pynneh pynsah ïa ka nam ka burom jong une u riewkhraw u jong ngi.”, la ong u Myntri Rangbah.
Nalor kata u la ong ruh, u Myntri Rangbah, u la ong ba ka sorkar Meghalaya ka ngeit ba ka long kaba donkam ban kynmaw burom halor ka jinglong jingim bad ia ki jingjop jong ki nongialam kiba la leit noh jong ngi bad ban pynrung ia kane ka sap ha phong hapdeng ki samla.Na ka liang ka sorkar ka ai ruh ka jingkyrshan halor ki sienjam ba la shim da ka Khasi Autonomous District Council lem bad kiwei pat ki district council na ka bynta ban buh ia ki rekod bad ruh ban pynmih ia ki jingthoh kiba iadei bad ki nongialam jong ngi.Nga sngewkmen ruh ban pyntip sha phi ba ka na ka liang ka sorkar ka don ia ka jingkut jingmut ban kyntiew ia ka roi ka par hapdeng ki kynhun samla lyngba ka YESS bad ka Meghalaya Grassroots Music Project.”
U la ong ruh ban kyntiew ia ka roi ka par na ka liang ka sorkar kan khmih ha kaba iadei bad ki jingtei bapher bapher ha kane ka thain ka ban kynthup ruh ia ka ophis deputy commissioner hapoh kane ka district kaba thymmai kumjuh ia ki convention centre, auditorium, jaka ialehkai sports bad ki jaka peitkai cinema hapoh ka district headquarter.
Kumjuh na ka liang u Bah Phrestar Manik Syiemlieh, Syiem ka Hima Nongkhlaw, ha ka jingkren u la pynpaw ka jingsngewkmen kaba khraw halor ka jingiadon lang jong u nongialam ka jylla u Conrad K. Sangma ha kaba kum kane ka sngi kaba kyrpang.U la ong ruh ba ka jingkyrshan ka jong u kan nang pynkhlain ha kaba iadei bad ka jingkut jingmut ka jong ngi ban pynneh pynsah ia ka nam ka burom jong u Syiem Tirot Sing bad ruh ban trei na ka bynta ka lawei kaba phyrnai bad ban pynneh ia ki hok bad ka jinglaitluid. U la ong ruh; “Ryngkat lang ngin iaksaid ban pynkup bor ia ki briew ki jong ngi bad ban tei ia ka imlang sahlang da ka jingshlur, ka jingiatylli bad ka jingkiew shaphrang.”
La pynphuh pynphieng ïa kane ka jingrakhe kynmaw burom da ka jingrwai na ka Tirot Sing Memorial College bad kumjuh ruh ka jingïakop rwai tynrai jong ki Skul bad ka jingïakop siat khnam.