U Maila Chetri u Nepali ba la tymmen tam ha Langpih

Nongstoiñ, Risaw, 02: Ki jaitbynriew Nepali wat la kim dei ki nongshong shnong ba pura jong ka ri India, hynrei ym lah ban len ïa ka jingshisha ba haman la kawei pa kawei ka jylla hapoh ka ri India, ki Nepali ki don tangba kim dei pat kiba bun paid kum kiwei ki jaitbynriew.
Haba phai ha ki jylla kiba don shaphang shatei lam mihngi jong ka ri India ha kine ki snem ki la kiew sted bha ha ka jingdon briew khamtam ha Meghalaya. Ha West Khasi Hills ha shuwa jong u snem 1982-83 hapoh un pud u sam jong ka hima Nongstoiñ, Myrïaw, Rambrai, Nonglang Sirdarship bad Jyrngam Sirdarship, ki lum bad ki khlaw ki btap ki dap da ki khuti jong ki Nepali.
U bah Maila Chetri u ba la 98 snem ka karta u ba shong ba sah mynta bad u para khatduh jong u ha Langpih, u la ïathuh ïa ka jinglong jingman ha ka por ba u dang khynnah bad u la ong ba nyngkong eh ki shong ha shnong Nonglang ha kawei ka jaka kaba dei ka per jong ka (L) kong Hiam Lyngdoh bad ha katei ka thaiñ ki don kumba saw khuti ki Nepali kiba ri muid.
U la ïathuh ruh ba shaphang shathie ha ka them wah Tyrsung ki don kumba shiphew khuti, hynrei kiba bun tam ki khuti jong ki Nepali ha kata ka por ki dei ha ka thaiñ Patharkhnang, Proin, Tynhiang, Porla bad kiwei kiwei ki jaka.
U la ïathuh ruh ba dei ha ka por ba ki briew na hima Maharam ki la wan buhai shnong ha Nonglang kata ha u snem 1951-52, ha kaba ki la don kumba saw ne san ïing ki la beh krad ïa ki na katei ka jakia bad ki la leit shong noh ha Kyndongei. Nalor kata u la ïathuh ruh ba ki la shong ha Kyndongei palat khatsan snem.
Hadien kata ki la phet noh sha Kyndangïawbah hajan ka shnong Ktiehthawïar bad ha kata ka por ha Ktienthawïar ki ba wan shong shnong nyngkong eh ki dei u (L) bah Phang, u (L) bah Raimon, ka (L) kong Jro, bad kiwei kiwei. Ha Kyndangïawbah ruh ki la shong kumba shiphew snem. Hadien kata ki la phet noh sha ki thaiñ Tynghor bad ki la shong ha Domtli, Porkadoh, Umthlong bad hadien katto katne snem ki la wan shong noh ha Mawsikar.
U la ïathuh ba ki la hiar noh sha Langpih bad ha ka por ba ki dang sdang wan shong khuti ha Langpih, ki don tang kumba saw ne san khuti ki Nepali bad ha ki por tlang ki leit buh khuti ha Mawdiangsnam, Umpha, Warla, Sahmiew, Umbah bad kiwei kiwei ki jaka. U bah Maila u la ïathuh ruh ba um don lok ne khun bad mynta u shong u sah bad u para khatduh jong u ha Langpih.