Hynñiew ngut ki longkmie ba armet ki khlad ha ki hynñiew bnai: Dr Laloo

0

Nongstoiñ, Risaw, 02: Ka jingsumar ïa ki longkmie ba armet bad ka jingpynsgewthuh sha ki ïa ki lad jingïaram ba ka sorkar ka la mang kyrpang na ka bynta jong ki ka long kaba donkam haduh katta katta, ong u Dr R.Laloo haba ai jingkren ha ka sngi thohdieng jong ka taïew ba la dep ha Langpih kaba long ruh ka sngi ba kyrpang na ka bynta ban sumar ïa u klongsnam.
U Dr Laloo haba ai jingkren ha katei ka sngi, u la ong ba naduh u bnai Ïaïong jong une u snem haduh mynta, hynñiew ngut ki longkmie kiba armet kiba dei napoh West Khasi Hills ki la khlad noh bad lai ngut na ki, ki dei na ki shnong kiba don ha ka thaiñ Langpih.
Haba pynshai shuh shuh halor katei ka jingjia ba sngewsih, u la ong ba ka daw ka lah ban dei namar ba kim tip ïa ki lad jingïarap ba ka sorkar ka la mang kyrpang na ka bynta jong ki. Ka dei ruh na ka jingbym shimkhia jong ki rangbah kiba tip bha shaphang ki lad jingïarap kiba ka sorkar, ka la mang kyrpang na ka bynta jong ki longkmie ha ka por ba ki armet.
Ha kajuh ka por u la ong ba ki don shibun ki longkmie ha shuwa ba kan poi ka por ban kha, ki ju khot ïa ki nongsumar kiba don ha ki shnong jong ki bad ha ka por ba kha ruh ki ju shaniah beit ha ki nongpynkha khun. Hynrei ki don pat ki nongpynkha khun ki bym shym pat la ïoh ïa ka jingpynbit na ki Doktor sorkar, kumta ka long kaba ma ban shaniah ha kiba kum kitei ki nongpynkha khun.
U la ong ba ki don pat ki nongpynkha khun kiba la ïoh ïa ka jingpyntbit na ki Doktor bad kiba ka sorkar ka la ithuh ïa ki kum ki nongpynkha khun, hynrei ka jingwan kha ha ki Hospiotal ka long kaba kham donkam bad kaba myntoi shibun na ka bynta jong ki.
U Dr. Laloo u la pynkynmaw ruh ba ka jaitbynriew Khasi Jaiñtia bad Garo ka dei ka jaitbynriew kaba ai jait ha ka kynthei bad lada jia ba ka longkmie ka khlad noh shiteng por, ka long ka jingduh kaba khraw ym tang ïa ki khun ki kti hynrei ïa ka shnong ka thaw bad ka jaitbynriew baroh kawei.
U la ong ruh ba ka por ka la dei eh ba ki rangbah, ki nongsynshar shnong, ki nonghikai skul bad ki samla pule bad ki khynnah skul ba kin don ka jingïatreilang kaba jan eh bad ki Doktor, ki Nurse, ki ANMs bad ban pynshai ha baroh ki longkmie ha ki shnong ki thaw, ba haba ki armet ki la dei ban leit phah peit ha ki Doktor, khnang ba ki Doktor kin ai jingmut ïa ki kumno kin leh haduh ban da dei ka por ban kha ïa i khunlung.
U la ong ba ka thong jong ki Doktor bad ki nongtrei hapoh ka tnad ka koit ka khiah jong ka West Khasi Hills, ki la buh mynta ïa ka thong ba la kumno kumno kumba 75% na ki longkmie ba armet napoh ka District, kin dei ban wan sha ki Hospital haba ka por ban kha khunlung ka la jan bad kim dei ban sngew artatien ei ei, namar ka sorkar kan pynbiang lut ïa ki jingdonkam baroh.

Leave A Reply

Your email address will not be published.