U drok u la ïoh ban rung haduh ki shnong ba kyndong tam shongsyier ka imlang sahlang

Nongstoiñ Nohprah 14: Wat la ka sorkar bad ki bor ka aiñ ki dang ïakhun ban khanglad ïa ka jingkhaï beaiñ ïa u drok hynrei ka jingsaphriang sted jong utei u jigdih ba sniew ka long kumba pur ka ding ha u phlangïap ha ka por pyrem.
Ym lah ban len ba ka jingsaphriang sted jong u droks ha West Khasi Hills ka la ong kaba shyrkhei haduh katta katta bad lehse ym ym don shuh ki jaka kiba um pat ïoh ban rung.Dang ha kine ki khyndiat sngi katto katne ki longkmie bad ki rangbah na ki shnong kiba don ha thaiñ Muliang haba ïakren bad u nongthohkhubor ki la ong ba ha ka thaiñ Muliang u drok u la sdang ban ïoh rung naduh u snem 2021 ha ki katto kate ki shnong kum ha Nonglang bad kiwei kiwei ki shong ba marjan hynrei ha kine ki sngi imat u la poi shaduh Langpih bad kiwei kiwei ki shnong khappud bad ka Assam.
Kitei ki longkmie bad ki rangbah ki la ong ruh ba ha ki snem ba mynshuwa lada leit da ka kjat na Ktiehthawïar shaduh Langpih wat ha ka por mynmiet mynïong ruh ym don jing sheptieng ne jing suba sniew hangno hangno hynrei ha kine ki sngi wat mynsgi mynshai ruh ban leit marwei da ka kjat na Ktiehthawïar sha Langpih tang ki bym tip ne kiba kheiñduh ki nud hynrei ka la long kaba eh.
Nalor kata ki la ong ruh ba ha ki snem ba mynshuwa naduh Mawlan haduh langpih lada ïaid kjat ha ka por janmiet khamtam ha ki janmiet sngi u Blei ym ju lap wat tang uwei u khynnah samla ne u rangbah uba shongkai harud surok hynrei ha kine ki sngi naduh Mawlan haduh Langpih haman la ki jaka ki don ki khynnah samla shynrang kiba shong haduh ban da dum ka bneng ym tip ki ap ïano bad kajingdon jong kitei ki khynnah samla ha man la ki jaka harud surok ka la pynsuba sniew haduh katta katta.
Kumta ban teh lakam ïa ka jingsaphriang sted jong u droks ka por ka la dei ba ki dorbar shnong, ki sengsamla shnong, bad ki longkmie longkpa jong baroh ki shnong ki hap ban shim ïa ka jingkiitkhlieh ban peitngor ïa la ki khun ki kti bad ban bishar bniah ïa ka rukom long jong ki bad ka jingïatreilang kaba jan bha ka long kaba don kam eh.