Mawkyrwat, Nohprah, 14: U MLA jong ka Mawkyrwat Constituency u Bah Renikton Lyngdoh Tongkhar ha ka sngi Balang u la plie paidbah ïa ka jaka jngohkai ba itynnad ha shnong Mawrap, South West Khasi Hills District kaba la tip kyrteng kum ka ‘Urnar View Point’.
Ïa ka ‘Urnar Viewpoint’ la shna pynbha lyngba ka Mahatma Gandhi National Rural Employment Guarantee Act (MGNREGA) jong u snem 2022-23 ha ka mang pisa kaba T. 9 lak tam bad na ka Chief Minister’s Special Rural Development Fund (CMSRDF) ha ka mang tyngka kaba 2.50 lak. Ïa kane ka jaka jngohkai, yn sa peit bad pynïaid da ka Sharailang Tourism Cooperative Society Limited, Mawrap.
Ha ka jingïalang ba lyngkot, u Bah Renik u la ai khublei kyrpang ïa ki paidbah jong ka shnong Mawrap ba ki don ka mynsiem ban ïatreilang khamtam eh ban don ïa kawei ka jingmut ban kyntiew ïa ki kam jngohkai pyrthei hapoh ka shnong ka thaw. U la ong ruh ba kane ka dei shisha ka sngi jong ka jingjop ban pynurlong ïa ki jingthmu ban wanrah ka roi ka par ha ki shnong ki thaw lyngba ki kam jngohkai pyrthei. U la ai mynsiem, lyngba ka jingdon jong kane ka jaka jngohkai kan sa long kawei na ki lad ban pynim jaka kpoh bad pynkiew ruh ïa kam ki jam ha ka shnong.
U la pynkynmaw ruh ba ha u snem 2019 bad 2020, ma u lem bad u Myntri Shnong Mawrap ki la jurip ha kane ka jaka ban peit bad kam pat don eiei ha kata ka por hynrei ka don tang ka jaka ba la don lypa naduh mynshwa, kumta da ka jingkut jingmut u la pyrshang bad thaw ki lad ki lynti ban ïoh ban pynwan dur ïa kane ka jaka ha ka rukom kaba dei bad da kata ka jingthmu u Bah Renikton u la pan jingïarap lyngba ka Chief Minister’s Special Rural Development Fund (CMSRDF) kumba 2.50 lak.
U la ai mynsiem ïa ki paidbah ba ka mynsiem jong ka jingïatreilang jong ki ha kiba bun ki bynta bad ki kam ki jam kam dei ban kut noh hangne hynrei ki dei ban nang ai shuh shuh ka kti ka mon ka kti ka diang na ka bynta ban wanrah shuh shuh ïa ki kam pynroi hapoh ka shnong ka thaw bad kumjuh lyngba ka jingïatrei lang na ka MGNREGA bad BASIN ruh ka la long kawei na ki rad bah ban kyrshan ïa kane ka projek.
U Bah Renikton u la pynpaw ka jingkyrmen lyngba ka jingplie paidbah ïa kane ka jaka, ki nongwan jngohkai kin sa bun ban wan bad u khot da wer de ïa ki paidbah na kylleng ki jaka bad khamtam eh kiba ju mlien ha ka kam jngohkai pyrthei na kylleng jong ka Ri Khasi Jaiñtia bad kumjuh ïa kiba nabar ka jylla ba kin wan sakhi hi da la ki jong ki khmat ban wan peit ïa ki jaka jngohkai pyrthei kiba itynnad kiba don hapoh ka South West Khasi Hills District.
Ha kane ka jingplie ïa kane ka View Point la donlang ruh u Block Development Officer (BDO) jong ka C&RD Block Mawkyrwat Bah I. Lawrynniang, u Block Project Management Unit jong ka BASIN Bah Bansuk Syiem, u Bah Neverlin Snaitang uba dei u Chairman jong ka Sharailang Tourism Cooperative Society Limited, Mawrap bad kiwei kiwei.
