Plie u Bah Wailadmiki Shylla ïa ka ïew pyninam ba ar sngi jong ki nongrep ha Jowai

Jowai, Nohprah 14: Ka ophis jong u Deputy Commissioner West Jaiñtia Hills District ha ryngkat ka Meghalaya State Rural Livelihoods Society, kila pynlong ïa ka ïew pyninam ïa ki mar rep kaba ar sngi ïa kaba la sdang mynta ka sngi 14 tarik bad pynkut lahshai 15 tarik u Nohprah ha madan Ladthadlaboh, Jowai ïa kaba la tip kum ka ‘District Buyer-Seller Meet cum SHG Mela’.
Ha kane ka sngi sdang na ka liang u MLA ka Jowai u ma Wailadmiki Shylla uba dei ruh u Chairman ka MUDA ula long u kongsan ha ryngkat ka jingïadonlang u F.B Basan MCS PD DRDA, u Dr. B. Plain SMM-LP, MSRLS, ki ophisar na ki tnad treikam ka District Agriculture, Veterinary, Fishery, ki nongrep napoh ka District nalor kiwei de.
Ha kane ka ïew pyniñam ïa ki mar rep mar riang naduh ki jait jhur, jait syntiew, ki symbai jhur, ki tiar ba shna kti, ki jaiñ ki nep, ki jingbam tynrai ba bun jait nalor kiwei kiwei la wan rah da ki nongrep jong ki shnong bapher bapher, kumjuh ki kynhun treimon sngewbha hapoh ki Block jong ka West Jaiñtia.
U kongsan u ma Wailad haba kren kum u kongsan ula kyntu ïa ki nongrep ba kin trei shitom haka kam, khnang ba ka jylla kan long ka nongpynmih bam ym shuh kaba dawa bam na kiwei pat ki jylla.
Ula kyntu ruh ïa ki samla pule ba kin pynliet jingmut kumjuh haki kam la jong, da kaba ula pynsngew mynta ym donkam shuh ban phai tang ha kawei ka liang kata ban ïoh kam sorkar namar ïa ka kam sorkar ym lah shuh pyndap ïaki khun samla hapoh ka jylla.
Shuh shuh ula ong ‘kumba long mynta ki don shibun ki kam hapoh kane ka jylla ha kaba bun na ki trai jylla kim pat shim ïa kine ki jait kam haduh ba la pynlong ïa ki briew ba nabar ban wan trei hapoh kane ka jylla ba ieit’.
Ula ong ba ka sorkar hapoh ka jingïalam u Myntri Rangbah ka jylla u Conrad K. Sangma kala pyllait shibun ki skim bapher papher na ka bynta ki khun samla ba kin ïoh ban seng ïa ki kam la jong ryngkat ka Subsidy kaba rit eh.
Kum u MLA un pyrshang ha kine ki snem ban wan ban lung lang ïa baroh ki tnad sorkar kiba ju pynlong kum kine ki ïew pyninam ban pynlong noh tang kawei ka ïew pyninam kaba heh hapoh ka District kaba lah ban pynlong kumba 2 ne 3 sien ha ka shisnem khnang ba kan long ka jingmyntoi ïa ki nongrep ba kin ïoh ban pynpaw pyrthei ïa ki mar rep bad ha ka juh ka por ki lah ruh ban pynïaid ïew bha ïa ki.
Ïa ka jingïalang la pynïaid da u ma W. Pale DFS-LP bad ïa ki kyntien ai khublei la ïoh na u ma K. Kharkongor DFS-SISD, ha kane ka sngi la sam ruh ïaki khusnam sha ki nongrep ha ki ar bynta kata ka nam Krishi Sakhi bad ka nam Pashu Sakhi.