Tyrwa ka VPP ban pynbeit thymmai ïa ka Constitution (ST) Order, 1950, yn thaw Komiti ka Sorkar

Shillong, Nailar, 29: U Myntri ka Sorkar Jylla uba khmih ïa ka tnat Social Welfare u Bah Paul Lyngdoh ha ka sngi Palei u la kular hapoh ka Ingdorbar Thawaiñ ba ka Sorkar kan sa thaw da ka komiti ka ban khmih bniah ïa ka jingtyrwa na ka bynta ban wanrah ïa ki katto katne ki jingpynbeit thymmai ïa ka Constitution (Scheduled Tribes) Order, 1950 bad ban wanrah ruh ïa ka kaiphod hapoh lai bnai.
“Ka tnat kan sa thaw da ka Departmental Committee ban bishar bniah bad ban wanrah ïa ka kaiphod kaba bniah hapoh lai bnai,” la ong u Bah Paul Lyngdoh haba jubab ïa ka Resolution ba la wanrah da u MLA ka VPP na North Shillong u Bah Adelbert Nongrum ha ka sngi basaw jong ka Dorbar Synrai ka Ingdorbar Thawaiñ ka Jylla.
Katkum kane ka Resolution la dawa ban pynsngew sha ka Sorkar Pdeng ïa ka jingdonkam bakongsan ban wanrah ïa ka jingpynbeit thymmai shuh shuh ïa ka Constitution (Scheduled Tribes) Order, 1950 khnang ban lah ban weng bad pynkylla ïa ka thup jong ki jaitbynriew ha ka Part XI jong ka Schedule kaba ïadei bad ka jylla Meghalaya, da kaba bud ryntih ïa ka jingbun briew jong ka jylla.
“Ngin sa ïakren bad ki kynhun bapher bapher bad ban ïoh ïa ki jingpynsngew jong ki shwa ban ai ïa ka kaiphod kaba khatduh,” u la ong bad bynrap, “hadien kata, yn sa phah sha u Registrar General of India bad ngin sa nang buddien ïa kane ka kam katkum ki kyndon ba la kdew.”
Ka Part XI jong ka Constitution (Scheduled Tribes) Order, 1950 (Part III – Rules and Orders under the Constitution) ka dei ka thup ba la pynbna ïa ki Scheduled Tribe ha Meghalaya kiba haduh mynta ki don 17 tyli ki jaidbynriew riewlum ba la ithuh kum ki Scheduled Tribe.
U Bah Lyngdoh u la ong ba ha u bnai Jylliew, 1999, ka Sorkar ka la mynjur ïa ki rukom treikam ha kaba ïadei bad ka jingpynrung ne jingweng noh na ka thup jong ki Scheduled Tribes. Katkum kine ki kyndon , tang kito kiba la ïoh jingithuh ki la ïoh ruh ïa ka jingmynjur na ka Sorkar, na ka ophis Registrar General of India bad na ka National Commission for Scheduled Castes & Scheduled Tribes.
Ki don ki jingthoh ba la ïoh pdiang da ka Ministry of Tribal for inclusion na kino kino ki kynhun jaidbynriew ba don ha ka thup jong ka Scheduled Tribe jong ka Jylla/UT, ka Ministry ka la phah ïa ki jingthoh sha ki sorkar jylla/UT ban ai jingmynjur katkum ka jingdonkam hapoh ka Article 342 jong ka riti synshar ka ri India. Lada ka Sorkar Jylla ka mynjur ïa ka jingtyrwa, ïa kata ka jingmynjur la phah sha ka ophis Registrar General of India (RGI), u la ong.
Ka ophis Registrar General of India (RGI), lada ka la hun ïa ka jingmynjur na ka Sorkar Jylla, ka phah ïa ka jingtyrwa sha ka Sorkar Pdeng. Hadien kata, ka Ministry of Tribal Affairs kan phah ïa ka jingtyrwa sha ka National Commission for Scheduled Castes and Scheduled Tribes na ka bynta ka jingai jingmynjur, u la bynrap.