Shillong, Nailar 29: Ka Sorkar jylla ka dang ap ïa ka jubab na ka sorkar pdeng ha kaba ïadei bad ka shithi kaba la banjur ha kaba ïadei bad ka jingpyntreikam ïa ka Meghalaya Residents Safety and Security (Amendment) Bill, 2020 kaba dei ruh katkum ka riti synshar kaba pyrkhing ruh ha kaba ïadei bad ka rung ka mih jong ki bar jylla.
Ha kajuh ka por bad ka jingpyntrikam ïa ki katto katne ki facilitation centre kaba la bthah da ka ïingbishar, na ka liang jong ka sorkar ka la pyntreikam ïa kiwei pat ki kyndon jong ka MRSSA, 2016 kaba don ka jingpynithuh ïa ki nongwan bylla. Kumba ka long mynta kumba 16 tylli ki shnong ki la pyntreikam ïa ka Act.
ïa kane la jubab da u Myntri ka tnat ki kam Pohïing ka jylla u Bah Prestone Tynsong ha kaba ïadei bad ka phang ba la wanrah da u nongïalam ka liang pyrshah bad u MLA ka TMC u Mukul Sangma hynne ka sngi.
ïa kane ka phang kaba la shah weng noh hadien ba la kyntu ïa ka sorkar jylla ban pyntreikam noh ïa ka MRSSA, 2016 kumba ka dei ban long na ka bynta ka bha ka miat jong ki paidbah ka jylla.
Lah ban ong ba ka Ministry of Home Affairs (MHA) lyngba ka shithi kaba 16 tarik u Jylliew, 2023 ka la pyntip ba ka sorkar jylla lyngba ka tnat law department ka la ai jingmut ba ïa kane ka bill kaba la pynthymmai ka la tam ïa ka jingthmu jong ka Meghalaya Residents Safety and Security Act, 2016 (MRSSA) da kaba shim ïa ki jnit ki jnat jong baroh ki briew kiba sah ha ka jylla bad ka jingpynshitom ha kaba ïadei bad kane ka bynta. La ong ba kane ka amendment Bill kaba la tyrwa ka la pynkheiñ ïa ka Article 19 (1) (d) bad (e) jong ka riti synshar jong ka ri.
Na ka liang jong u Bah Tynsong u la pyntip ba ka sorkar jylla ka la jubab ïa kine ki jingmih lyngba ka shithi kaba 21 tarik jong u bnai Rymphang, 2023 ha kaba ka sorkar jylla ka la ong ba kane ka Bill ka long kaba treikam Bill bad kam shym la pynkheiñ ïa ka Article 19 jong ka riti synshar jong ka ri India bad kane ka donkam ïa ka jingpynbha ban pynkhlaiñ ïa ka MRSS Act.
“Shuh shuh ïa ka DO kaba ha ka 14 tarik mynta u bnai, 2024, la phah biang sha ka Union Home Secretary da Chief Secretary kaba la banjur halor ka jingtreikam jong ka Amendment Bill bad kane kan ym ailad ïa ki briew kiba nabar ban shang khlem ki jingshah pyrkhing kiba long ruh hapoh ka Article 19 (5) jong ka riti synshar jong ka ri,” ong u Bah Prestone.
