Shillong, Nailar 29 : U Myntri Rangbah ka Jylla, Conrad K Sangma ha ka sngi Palei u la ïathuh ba ka sorkar jylla ka la pynlut kumba 100 klur tyngka na bynta ban thung ïa ki 99 lak tynrai tylli ki tynrai dieng ha kine ki san snem, kata naduh u snem 2020 haduh 2024.
Ïa kane u Myntri Rangbah u la pyntip haba jubab halor ka jingkylli ba wanrah da u MLA ka Mawryngkneng, Bah HS Kharpran ha ka Dorbar Synrai hynne ka sngi.
Nalorkata, u Myntri Rangbah u la ïathuh ba ïa kitei ki tynrai dieng la thung ha ka jaka kaba heh kumba 1.19 lak hectare.
“Ki don baroh kumba 99,78.352 tylli ki tynrai dieng ba la thung ha ka jylla naduh u snem 2020 haduh u Jylliew mynta u snem bad na kine kumba 73.76 lak tylli ki im,” la ïathuh shuh shuh u Myntri Rangbah.
Halor ka jingkylli, u Conrad u la ong ruh ba ka jingpoi ki dieng kiba im ka la kot sha ka 75 persen bad kumta kam dei shuh kaba khyndiat watla ka thong ka long ban peit ba baroh ki tynrai dieng kiba thung kin im lut.
Ha kajuh ka por u la ïathuh ba ka sorkar jylla ka pyrshang ban ïoh ïa ka jingïatrei lang jong ka shnong khnang ban pyntikna ba ka jingim jong kine ki tynrai dieng kan kham bun.
Nalorkata, u ong ruh ba ka sorkar ka thmu ruh ban ai khusnam sha kito ki shnong kiba lah ban pynim lut ïa ki tynrai dieng ba la thung.
Shwa kane, u Myntri Rangbah u la ïathuh ruh ba ki don bun ki daw kiba pynlong ïa kine ki tynrai ba kin ym lah ban im lut kynthup naduh ka jinglong ka khyndew, ka jingpluh khlaw bad kiwei kiwei.
