Twa ka kynroh ka 5-star hotel ba dang shna ha Khanapara, liem 12 tylli ki masi, lait thaw ki briew

Nongpoh, Naitung 24: Kumba 12 tylli ki masi kila iap ha ka jingtwa khyndew ba shyrkhei haka thaiñ khappud ka Meghalaya bad Assam ha Khanapara, hadien ka jingther u lapbah ba jur hynnin ka janmiet bad donbok ba ha kane ka jingjia ki briew kila lait thaw naka jingmynsaw bad ka jingjia ba sngewsih.
Katkum ka jingtip bala ioh lum la ong ba kane ka jingjia kala jia ha ka shnong Pahamkynchoh Khanapara haka por kumba 5 baje eiei janmiet, bad namar ka jingsynjor ka khyndew bad ka kynroh jong kawei ka 5-star hotel kaba dang shna kala twa kynsan bad tap ïa kawei ka sem masi kaba don sharum haduh ba 12 tylli ki masi kila iap hajuh.
Kitei ki masi kidei kiba la long trai da u Shiva Poudel bad katkum ka jingïathuh jong u ka jingduhnong kam duna shuh ïa kumba 60 lakh.
Naka liang u trai kitei ki masi u la buh ruh da ka ejahar pyrshah ïa u trai katei ka 5-star hotel kaba la sahkut la slem ha katei ka jaka bad dawa ruh ban siew bai lutksan bad ruh u trai katei ka hotel u dei ruh ban shna bha naka bynta ka jingshngaiñ jong ki paidbah kiba shong ba sah sharum katei ka hotel.