Tur ka VPP sha Secretariat, shah bat u MLA bad GS hajan ophis DC, poi u Bah Adelbert hakhmat Secretariat
Shillong, K’lyngkot 19: ka Voice of the People Party (VPP) ka la byrngem ban bteng beit ka jingïakhih hakhmat Secreteriat tad haduh ba ka sorkar kan da thungkam biang ïa ki 3 ngut ki ophisar jong ka Meghalaya Lokayukta, kiba la shah weng kam hadien ba ki la sei madan ia ki kam bamsap jong u MLA ka Mahendraganj, u Sanjay Sangma.
“Ngin bteng biang ïa kane ka jingïakhih ha ka 22 tarik bad ngin tur beit sha Secretariat”, la ong u Dr. Ricky AJ Syngkon, General Secretary haba ïakren bad ki nongthoh khubor ryngkat ka jingïadon lang ki 3 ngut ki MLA, u Bah Bright, Bah Adelbert bad Bah Heaving bad kumjuh ruh u Dr. Batskhen Myrboh, u Nongaiktien jong ka Seng.
U Dr. Batskhem, u la ong ba dei ba ka VPP ka la pule bha ia ka aiñ jong ka Lokayukta ba sa mih sha surok, namar ka la lap ïa ka jingle beaiñ jong ka sorkar, namar ka rukom weng ïa ki 3 ngut ki ophisar kadei kaba shu leh beaiñ bad bym don nongrim haei haei ruh em.
“Phi ki nongthoh khubor leit pan na ka sorkar ne na ki nongaiktien ka sorkar ia ki kot ki sla hangno kadon kata ka jingthoh ba ka shu thungkam shipor ïa kine ki 3 ngut ki ophisar, Leit kylli maphi”, la ong u Dr. Batskhem.
Hynrei ka sorkar ka la shu weng syndet ïa ki khlem da pyni daw bad khlem da ailad ïa ki ba kin pynshai ne ai jingujor ruh.
U la ong ba ka jingïakhih ka VPP kam dei tang na ka bynat kine ki 3 ngut ki ophisar, hynrei kadei na ka bynta ka jingtreikam ka Lokayukta baroh kawei, namar kane kadei ka bor treikam ban tohkit ïa ki kam bamsap ha ka jylla. “Lada ngi shah ba ka sorkar kan shu lehmon kumne ïa k Lokayukta, lashai la shisngi yn nym don mano kano ba treh ban treikam ha kane ka bor treikam bad ka jingduhnong kan long ïa ka jylla”, la ong u Dr. Batskhem.
Ha shuwa jong kane, namar ba ki bor synshar District ki la pynjari da ka Section 144 CrPC ha ki jaka 200 meter sawdong ka Secretariat, ki Magistrate bad ki Pulit ki la bat noh hajan DC ophis ïa u Bah Brightstarwell Marbañiang, MLA Mawlai bad ïa u Dr. Ricky Syngkon, General Secretary bad katto katne ki dkhot. Katba u Bah Adelbert Nongrum, MLA North Shillong bad katto katne ki dkhot ka CEC ki la poi tiap haduh hakhmat Secretariat hapdeng ka jingkyndit bad jinganglyngngoh ki Pulit bad ki Magistrate.
Hadien kane baroh ki nongialam ka VPP bad ki nongkyrshan ki la shong lang noh harud surok kaba don mar pyrshah ka High Court of Meghalaya haduh ka por 4:30 janmiet kumba la buh ka por ban pynlong ka jingïakhih.