Phah jied u Dy. CM ïa ka jaka ïakren lada tieng ki nongïalam HNLC ban wan sha Meghalaya

Shillong, K’lyngkot, 19: Ka Sorkar Jylla ha ka sngi Thohdieng ka la kyntu ïa ka seng kieng atiar ba la shah kheiñ be-aiñ ka Hynñiewtrep National Liberation Council (HNLC) ba kan pyrkhat biang sa shisien halor ka jingshim rai ban pynkut noh ïa ka jingïakren ïasuk bad ka Sorkar Pdeng bad ka Sorkar Jylla.
U Symbud Myntri Rangbah ka Jylla uba peit ïa ka tnat Kam Pohing u Bah Prestone Tynsong, u la ong, ba ka Sorkar ka long kaba kloi ban ïakynduh ïa ki nongïalam bahakhmat jong ka HNLC ha ka jaka kaba ki jied hi ban pyntyllun shakhmat ïa ka jingïakren bad pynthikna ba ka jingïakren kan pynmih ïa u soh.
U Chairman ka HNLC cum C-in-C u Bah Bobby Marweiñ bad u General Secretary cum Publicity Secretary Bah Saiñkupar Nongtraw ki ladep phah ïa ka shithi sha ka Ministry of Home Affairs lyngba u Advisor u AK Mishra ban pyntip halor ka rai ba ladep shim ban weng noh na ka jingïakren ïasuk da kaba pynpaw ba ka Sorkar kam shym la kohnguh ban mynjur ïa ki san tylli ki jingdawa ba kynthup ïa ka jingmap ei ïa ki dkhot bad ïa ki nongïalam jong ka seng.
“Ka kabu ksiar ka jia tang shisien ne arsien bad kan ym jia shuh lano lano ruh. Ka jingkyrpad jong nga ïa ki nongïalam ka HNLC ka long ba kin pyrkhat bad ban phaidien biang ïa ka rai kaba phi la shim bad ban pyntip sha ka sorkar,” ong u Bah Tynsong ha ka jingïakren bad ki lad pathai khubor.
“Nga kwah ban kyrpad ïa ki nongïalam bahakhmat lada ki sheptieng ba ki lah ban shah kem, nga kyntu ïa ki ban jied hi ma ki ïa ka jaka, ngi (sorkar) long kiba kloi ban ïakynduh ïa phi hangta bad ban ïakren namar ba ngi kwah ban pynthikna ba ka jingïakren ïasuk kan long kaba seisoh bad kaba kut syndon,” u la ong.
U Bah Tynsong haba pynshai ïa ka jingkyrpad jong ka Sorkar ban pynlong ka jingïakren bad ki nongïalam jong ka seng u la ong, “namarba ki briew ba la pynkupbor da ka HNLC kim lah ban shim ïa ka rai, (ha ka jingïakren bad ka sorkar), ngi la ïaiban ba ka jingïalang ka dei ban long bad ki nongïalam, kiba lah ban shim ïa ka rai (ha kiba bun ki mat) namarba ngi kwah ba ka jingïakren kan don ka jingpynkut. Namarkata, ki nongïalam ki dei ban wan shakhmat (sha ka miej jingïakren).”
U la ong ba ka rai jong ka HNLC ban weng na ka jingïakren ka la pynkyndit ruh ïa ka Sorkar.
Halor ka jingdawa jong ka HNLC ïa ka jingmap ei, u Bah Tynsong u la ong, ha ka jingshisha, ha ka jingïakren banyngkong, u ksiang jong ka Sorkar bad u Advisor ka MHA ki la kyrpad ïa ka seng ba kan phah ïa ka thup kyrteng jong ki dkhot, kiba dang sah pongding ki mukotduma ha ki kashari bapher bapher khnang ba ka Sorkar kan dup lah ban bishar ïa kaei kaba ka lah ban leh.
Katkum ka jingong jong u, ka HNLC kam shym la aiti satia ïa ka thup kyrteng jong ki dkhot kiba dang sah pongding ki mukotduma pyrshah ïa ki.
“Ngi la bthah ba kin ai ïa ki jingtip ba bniah bad kim shym la ai satia bad ngi la ïai ap pynban ngi ïoh pdiang da ka shithi kaba kim kwah shuh ban dang bteng ïa ka jingïakren ïasuk namar kane. Ha ka jingshisha, kane ka ishu ka dei kaba ladep ban ïakren ha ka jingïalang banyngkong eh. Na kata ka daw, ki nongmihkhmat ka HNLC ki la leit phai noh sha Bangladesh ban ïasyllok bad ki nongïalam halor kane ka mat, kaei ka jingïakren, kaei ka jingpynksan bad ka jingtyrwa ba la ai da ka Sorkar ïa ki nongïalam bahakhmat,” u la ong.
Ka seng ka la kdew ba ka jingïoh shithi shah khot hajir na ka NIA bad na ka kashari jong u Judicial Magistrate First Class, Shillong katba ka jingïakren ïasuk ka dang ïaid, ka la pynartatien ïa ka seng.
Halor kane, u Bah Tynsong u la ong ki notis khot hajir kim dei kiba la phah da ka Sorkar Pdeng ne Sorkar Jylla namarba kane ka dei ka kam jong ka kashari.
“Hynrei ngan ïai ban. Nga la ong ïa phi ka jingkular ba la ai da ka Sorkar Jylla bad ka Sorkar Pdeng. Sngewbhah ïa ngi ki jingtip kiba bniah, ki dkhot ki don katno la ki don tang iwei ne ar ne lai kiba dang don mukotduma ha kashari lane 20 ne 30 ngut,” u la bynrap.