Shillong, K’lyngkot 19: Ha ka jingïapynheh hapdeng u MLA Mawlai, u Bah Brighstarwell Marbañiang, u Dr. Ricky Syngkon namar ka jingbym shah tdot ki Magistrate ban tur sha Secretariat, la ïohi ba ka la don ka jingïakhru arsien arwat hapdeng u Bah Bright bad ki Pulit.
Kane ka jingïakhru u Bah Bright bad ki Pulit ka long hadien ba ki Magistrate ki la pyneh beit triang bad saitlah artad ia ka jingpyni lem ki nongïalam ka VPP ban shah tang ia u Bah Bright bad u Dr. Ricky ban shu ïaid rah Placard nakhmat ka Secretariat. Kine ki nongïalam ki la kular ruh ba kin nym shah ia kiwei pat ki dkhot, kiba ha katei ka por ki don tang arngut laingut ban iaid sha Secretariat. Hynrei ki arngut ki Magistrate Kynthei kim shym la shah ban iaid. U Bah Bright haba u la iohi ba kim shah kumne, u la ong ba un iaid noh na ka surok kaba iaid na Raj Bhavan bad hamar ba mut ban iaid kumne, ki Pulit ki la bat trait ia u bad u Bah Bright ruh u la pyneh bad ïaksaid ban ïaid beit. Ka la don ka jingïapatan shiphang hynrei namar ba la wan poi noh kiwei ki dkhot ka VPP ki Pulit ki la pynjem noh.
Na pyrshah ophis DC kane ka jingïaksaid ka la poi kham haneng, hajan ki dukan sha jong ka High Court. Ha kane ka por la poi lang ki jong u Bah Adelbert bad kiwei ki nongialam ka VPP ha kaba ka la don biang ka jingïakren ban shah noh tang ia ki MLA ka VPP kiba don ha katei ka por, namar ba u Bah Ardent u don prokam sha Saphai, hangne ruh ki Magistrate kim shyn la shah tdot bad ki Pulit ruh ki la nang bun bha ryngkat ka kieng atiar.
U Bah Bright u la khie dom biang bad mut ban ñiom biang sa shisien sha Secretariat, hangne ruh ki Pulit ki la kynrup bad patan ïa u sha kyndong haduh ban ka la don ka jingïalymbud ïa ki Scooty kiba ïaid na kane ka surok. Ki dkhot ka VPP kiba don hangtei ruh ki la khih puk ban kynhied ïa ki Pulit kiba la ktah kti ïa u MLA.
Ki la don ruh ki longkmie kiba la ïeng na phyllaw ki dukan sha hajan ka ophis SBA, ki la hylla bad pynrem jur ïa ka jingle ki Pulit.
U Bah Bright uba ïalade u la trei teng ruh kum u Pulit, u la pynpaw ka jinglyngngoh balei ba ki Pulit man ba don ki jingïakhih ki hap ban kah ïa ka dur khmat ne deng mask. Nangta u la ong ruh ba ka jingshisha ki Pulit kidei ban don ka nameplate ne ka jingthoh kyrteng hakhmat jong ka uniform. Hynrei hangne ym ju kham ïohi ba ki Pulit kin don ki nameplate.
Ha kaba ïadei bad ka jingktah kti ki Pulit ïa u, u Bah Bright u la ong ba ka Seng kan sa leh ïa kaba donkam.
