Imat don jingïadei kito kiba shah weng dkhot Lokayukta bad ki nongïalam ka VPP : Dy CM

Shillong, Kyllalyngkot 19 : U Symbud Myntri Rangbah ka jylla u bah Prestone Tynsong mynta ka Sngi Thohdieng u la ong imat kito ki shah weng kum ki dkhot ka Lokayukta ki don jingïadei kaba jan bad ki nongïalam ka Voice of The People Party (VPP). U la kynthoh ïa kane hadien ba ki MLA ka VPP ki la mih sha surok ban dawa thung dkhot Lokayukta biang ïa kito kiba la shah weng da kaba rai ban leit shong kyllaiñ myngngor mynta ka sngi hakhmat Secretariat.
Haba ïakren bad ki nongthoh khubor u bah Prestone u la ong “ Nga la ïohi ba ka jingdawa ba hakhmat eh jongka VPP ka long ban thung biang ïa kito ki ophisar ba la shongthait, hynrei nga kwah ban kylli ïa ki halor kano keiñ ka nongrim ba ka sorkar kan thung biang namar mynta ki la dep thung dkhot pura ïa ki ophisar kiba dang trei ha ka kam”.
“ Ngam tip shuh balei ba ki MLA jongka VPP ki hap ban mih sha surok bad dawa kumne.Ngi la ïoh pdiang ïa ka shithi ba ki la phah bad ngi la bishar bniah nadong shadong bad ngi la pynshai ruh ba ka aiñ kam shah. Kumta ngam shym ïohi ba kan don jingbakla hangno hano ruh halor kane ka jingrai jongka sorkar ban weng ïa ki ophisar ba la shongthait bad thung noh da ki ophisar kiba dang don ha ka kam” ong biang u Symbud Myntri Rangbah.
U la ong shuh shuh “ Ka don ka jingïapher kaba khraw hapdeng kiba la shongthait bad ki bym pat shongthait. Namar haba ngi thung da kiba dang don ha ka kam ym donkam ban siew tulop biang ïa ki namar ha ka jaka ban siew tulop la shu siew noh tang ka TA/DA bad dei ruh halor kata ka nongrim ba la thung da kiba dang don ha ka kam”.
Haba jubab ïa ka jingkylli ba ka VPP ka pyrshang ban pynïasnoh ïa kane ka rai jongka sorkar bad ka kam bamsap bad u MLA ba mynta uba la dep pynngat kyndon da ka Lokayukta, u la ong “ Na kata ka daw nga sa ong ba kito kiba shah weng ki don ka jingïadei bad ki nongïalam ka VPP”.
U la ong ruh ba kam don daw ei ei ïa ka sorkar ban khot ïakren ïa ki VPP. “ Ngin ym khot ïakren ïa ki namar lada ki kwah ban wan ïakren ngi long kiba kloi ban ïakren lada ki wan da ka lynti kaba dei hynrei ban khot te em namar ngi la dep ruh ban pynshai kdar na ka liang ka sorkar.
U la ong ruh ba ka sorkar ka leh kat kum ki kyndon jong ka aiñ Lokayukta kaba la kren shai kdar ba dei ban thung da ki ophisar kiba dang don ha ka kam kum ki dkhot ka Lokayukta.