Tuid ki paidriewngeit sha ka sngi burom ka Dohnud bakhuid tam U Jisu ha Mihmyntdu, Jowai

Jowai, Jylliew 24: Da ki spah ngut ki paidriewngeit jong ka Balang Katholik napoh ka Parish Jowai bad nabar ki la ïatuid hynnin ka sngi 23/06/24 sha ka sngi burom ka Dohnud bakhuid tam u Jisu ha Mihmyntdu, West Jaiñtia Hills bad la nangpynkhraw shuh shuh ïa kane ka sngi ha kaba da ki phew ngut ki Heprit (shynrang bad kynthei) kila ïohpdiang ïa ka Communion ba nyngkong jong ki.
Ha ka por 10 baje mynstep la don ka jingkñia Mass bakhuid, ha kaba u Rev. Fr. Hilarius Lamare, Parish Priest ka Jowai Parish u long u Nongkñia Rangbah haka jingïadonlang u Rev. Fr. Simeon Sungoh bad u Rev. Fr. Laurence Paswet phadar synrop ka Jowai Parish.
U Rev. Fr. Hilarius Lamare haba kren ha kane ka sngi u ong haba ngi pynlong ïa kane ka sngi burom jong ka Dohnud bakhuid tam U Jisu ka long ka sngi ha kaba ngi pynthymmai ïalade ban long ki Nongbud ba shisha jong u bad ban bud ïa ki jinghikai jong u, naba u Jisu u long uba sngewrit, uba jemnud, uba dap da ka jingisnei bad ka jingieid ïa ki briew baroh.
Haba phai sha ki Heprit kiba iohpdiang ha ka jingim jong ki ïa ka Communion ba nyngkong, u kyntu ïa ki ban long kiba tista ban wan sha ki jinglehñiam bad ban pdiang borabor ïa ka Communion bakhuid ha ka jingim jong ki.
Ha ka nohphai sngi la nangïoh shuh ïa ka jingkren kaba sngewtynnat shaphang ka Dohnud bakhuid tam jong u Jisu da u bah Fridian Marbaniang, na ka Parish Mawlai Archdiocese Shillong bad pynkut ïa kane ka sngi da ka jingkyrkhu da ka Sakrament bakhuid tam ka Duwan.