Nongstoiñ, Naitung 23: Ka shnong Mawlangkhar kaba don haruh ka surok bah National Hghway 44 (E) Shillong – Tura kaba jngai tang kumba khatwei kilomitar na Nongstoiñ ka dei ka shnong kaba ki sawdong sawkun ki don ka jingitynnad jong ki lum ba jyrngam.
Naduh ba ka sorkar ka la pyndep ban shna ïa ka National Highway 44 (E) ka bynta ba shaphang shatei lam sepngi jong katei ka shnon ka la pynlong ïa ki nongleit nognwan na kylleng ki jaka jong ka jylla bad na shabar ka jylla ruh kiba ïaid na katei ka surok ba haba ki la poi ha katei ka jaka kim lah khlem da sangeh ban peit ïa ka jingitynnad jong ki sawdong sawkun naduh mihngi haduh sepngi khamtam ïa ka jingitynnad jong ki lum ba jyrngam.
Nalor kata ki trai jong katei ka jaka hadien ba ki la ïohi ba man la ka sngi da ki spah ngut ki nmongleit nongwan ïeng bad ki peit jawdud ïa ka jingitynad jong katei ka jaka ki la sdang ban shna noh da ki jaka shong kai bad ki la pynlong ïa katei ka jaka kum ka jaka jngohkai ha kaba man la ka sngi ki nong jngohkai ki tuid ban leit kiew sha jrong ki lum bad ban shong kai pyngad.
Shuh shuh man la ka sngi ki don ki nongwan shangkai suwari na kylleng ki jylla kiba wan ryngkat ki khun ki kti bad kiba ha ïng ha sem tang na ka bynta ban wan bam lyer pyngad ha katei ka jaka.
Ka jingitynnad jongkatei ka jaka ka la long ruh ka jingkyrkhu kaba khraw ïa ki nongshong shnong jong ka shnong Ksehkohlong kiba shong ha ka kyntoit Kormawleiñ namar na ka jingtuid ki nong wan jngohkai ki hap ban buh ïa ki dukan harud surok ban die ïa ki mar rep jong ki kum ki jhur ki jhep, sohsaw, biskot, sohkhia, riewhadem, pathaw bad kiwei kiwei ki mar rep ha kaba ha katei ka jaka baroh shilynter ka surok ka la kylla long kum ka ïew.
Ka long ruh kaba sngew tynnad ban tip ba la kumba arsnem ei ei ki nongshong shnong jong ka Kormawleiñ ki la sdang ban kiew ha ka ïoh ka kot bad ka mai kajih bad naduh ba ki nongwan jngohkai na kylleng ki jylla kila sdang ban wan ter shiter ka la long kawei na ki lad ai kam ai jam ïa ki trai jongkatei ka jaka . Shuh shuh lada ki trai jong katei ka jaka ki la lah ban buh da ki jaka sah kiba biang ïa ki nongwan jngohkai kan kyntiew shuh shuh ïa ka ïoh ka kot jong ki.
