Shillong, Naitung 23 : U Myntri ka tnat Public Health Engineering, u Marcuise N. Marak u la ong ba ka Sorkar Meghalaya kan pynlong ïa ka ‘Jal Utsav’ ha man la ki shnong jong ka jylla kum shi bynta jong ka Jal Jeevan Mission 2.0, ban pynsngewthuh paidbah ïa ka jingdonkam ban sumar bad jingïada ïa ki tyllong um.
Kane ka prokram pynsngewthuh paidbah ka la sdang ha ka 20tarik mynta u bnai ha ka jingïalang kaba heh bha kaba long ha State Convention Centre.
Ha ka jingïakren bad ki lad pathai khubor u Myntri u la ong ba ka jingïalap kaba yn pynïaid paidbah haduh 6 bnai kan long katkum lai tylli ki nongrim kiba kongsan, kata “Lehkmen (Celebrate), Sngewthuh (Understand) bad Ïada (Protect).”
Haba kren bad ki lad pathai khubor, u Myntri u la ong ba ka thong jong kane ka jingïalap ka long ban pynïasoh lang ïa ki Self Help Groups (SHGs) bad ki Rangbah Shnong ha ka jingsumar bad jingïada ïa ki tyllong um.
“Ka long ban lehkmen ïa ka um, ban pynskhem ïa ki tyllong um da kaba bud ïa ki lai tylli ki nongrim, kata lehkmen, sngewthuh bad ïada. Ngi kwah ban pynsngewthuh ïa baroh ki bynta ba ïadei bad kane haduh ka kyrdan jong ki shnong ki thaw,” ong u Myntri.
Halor ka jingtyrkhong jong ki pung um bad ki wah, u Myntri u la ong ba kane kam dei tang ka jingeh jong ka Meghalaya hynrei ka dei ka jingeh kaba ka pyrthei baroh kawei ka ïakynduh.
“Ka jingtyrkhong jong ki tyllong um ka dei ka jingeh kaba ka ri India bad ka pyrthei baroh kawei ki ïakynduh. Ka sorkar ka la sdang bun ki projek bad ki lad jingïarap ban ïada bad pynim biang ïa kine ki tyllong um, bad bun ki projek ki dang ïaid shakhmat na ka bynta kane,” ong u Myntri.
