Shillong, Naiwieng 04 : Ka tnad ïalehkai jong ka sorkar Jylla ka la thung ïa ki 400 ngut ki nongïarap (Volunteers) na bynta ban pynïid beit pynïaid ryntih ïa ka 2nd North East Olympic Games 2022 kaban sdang naduh ka 10 tarik haduh ka 16 tarik mynta u Naiwieng.
Ki 400 ngut kiba la shah thung kum ki volunteer kin peit naduh ka ai bam, ki jaka sah jong ki nongïalehkai bad ki nongïalam, ka leit ka wan, ki ai jingsumar, ki lad pathai khubor na bynta baroh ki 18 tylli ki jait jingïalehkai ha katei ka lympung bah.
Ka tnad ïalehkai ha ka sngi Thohdieng ka la ai jinghikai ïa kitei ki 400 ngut ha ka jingïalang ha State Convention Centre, ha kaba la wan ban ïashim bynta u Shivansh Awasthi IAS, Director jong ka Sports and Youth Affairs bad kiwei ki ophisar.
Ka kam jong ki ka long ruh ba kin pdiang ïa ki nongïalehkai na kiwei pat ki jylla kiban sdang ban poi sha kane ka Jylla ha ka taïew ban wan. Ka Sorkar kan ïarap siew ruh ka bai leit bai wan na bynta kitei ki 400 ngut .
La buh ruh ki nongïarap ha man kawei pa kawei ka jaid jingïalehkai bad la kham pynbun ha ka jingïalehkai kynjat ball bad Basketball namar kitei ki jingïalehkai ki kham khring ïa ki paidbah nongpeitkai.
