Thung ka Ïingkashari ïa u Advocate Kishore kum u Special Officer ka State Art Diagnostic Centre

Shillong, Ïaïong 26: Ka Meghalaya High Court ka la thung ïa u advocate bad secretary general ka High Court Bar Association Kishore Chandra Gautam kum u special officer ban lum thup ïa ki tiar kiba don hapoh ka State Art Diagnostic Centre ba la pynïaid da Suraksha Salvia LLP kaba ha Pasteur Institute, Shillong.
Ka la pynmih ruh ka jingbthah ba dei ban pynneh ïa ka status quo haba ïadei bad ka jingtei, ka jingpynthymmai bad ka jinglong trai ne ka jingpynïaid ïa ka Block-A, na ka jaka treikam jong ka diagnostic centre kaba don mynta.
Ka meij kaba kynthup ïa u Chief Justice IP Mukerji bad u Justice W Diengdoh ha ka hukum ba la pynmih ha ka 25 tarik mynta u bnai ka la ong, “Kane ka hukum kaba la pynmih ka long kaba kongsan ban pynlah ïa ka Court ban pynlong ka jingtohkit halor ka nature bad ka jingpynkheiñ ïa ka hukum kaba la pynmih ha ka 9 tarik mynta u bnai, lada don kano kano, ban pynkhuid ïa ka jingkynnoh contemnor jong kano kano ka jingpynkheiñ bad da kaba khang noh ïa ka jingpynkheiñ, halor ka prima facie case kaba la wanrah.”
“Ïa u Kishore Chandra Gautam, Advocate and Secretary General ka High Court Bar Association la thung kum u Special Officer ha ka jingsiew kaba sdang kumba T. 25,000/ – ba dei ban siew da u ne ka nongkyrpad ban leit jngoh ïa ka Block-A kaba ha Golflink, Shillong, Meghalaya, ban lum thup ïa ki tiar kiba don ha ka jaka bad ban wanrah ka kaiphod sha ka Court ha ka tarik ba la buh. Ki jingïakren ha ka jingïalang kaba pyndait lang bad ki thup jong ki tiar dei ban pynneh bad ban pyndait lang ha ka kaiphod,” ka la ong.
“Baroh ki party na ka bynta shipor ki dei ban pynneh ïa ka status quo haba ïadei bad ki jingtei, ka jingpynthymmai bad ka jinglong trai ïa ka Block-A bad kumjuh ïa ki tiar ba la lum thup ha kaba shipor ba la ngeit ba dei ban don bad kiba kyrpad,” ong ka meij ki nongbishar ha ka hukum.
Shuh shuh ka meij ki nongbishar ka la bthah ïa u Special Officer ban pynthikna ban bud ïa kane ka hukum da kaba ong, “Ki pulit ruh ki dei ban ai ka jingïarap ïa u Special Officer lada donkam bad haba don ka jingkyrpad.”
Ka hukum ka pynpaw ruh ba mynshwa na ka liang respondent State la sdang ban weng ïa ki tiar jong kiba kyrpad na Block-A da kaba dong bad weng ïa kito ki tiar.
“U la pynpaw ruh ba hadien ka hukum jong ngi kaba 9 tarik mynta u bnai kam shym la don shuh ka jingweng ïa ki tiar. Kane kadei ka jingbym shai da u Saha. Ngin hap ban buh ïa ki jingkylli kham hadien, aiba ka kaiphod jong u Special Officer kan wan. Ngi pynmih ïa kine ki application returnable ha ka 9 tarik u bnai Jymmang, 2025,” bynrap shuh ka meij ki nongbishar.