Shillong, Naitung 12: Ka KJP Synod Sepngi, ka la ai da ka jingthoh sha ka Law Commission of India ban ai jingmut bad pyrshah ruh ïa ka Uniform Civil Code (UCC).
Ka kyrwoh ba la phah da u Senior Executive Secretary ka KJP Synod Sepngi, u Rev. ER Kharkrang, ka ong ba ka daw ba ka Synod ka pyrshah ïa kane ka aiñ, dei namar ba kan ktah ïa ka jingpyndonkam ïa ki riti, ki rukom bad ki dustur tynrai kiba kum ka jaidbynriew ka ju bud bad pyndonkam lynter lynba ki phew badspah snem.
Ka Synod ka ong ruh ba ka UCC kan ktah ïa ka rukom pynïaid shongkha shongman, ka hiar pateng, ka rukom shim jait ba ka jaitbynriew Khasi ka ju shim na ka Kynthei.
Shuh shuh ka Kyrwoh ka ong ruh ba kan ktah ïa ka Article ba 25 jong ka Riti Synshar ka ri India kaba pynïoh ïa ki nongshongshnong ha ka ri baroh kawei ïa ka jinglaitluid ban pyndonkam ïa ka jingsngew ha kaba phla, nangta ka hok laitluid ha kaba leh ne practice, ban pynsaphriang ne propagate ïa la ki jingngeit katkum ka jingngeit ki nongshongshnong ha ka ri.
Shuh shuh ka Synod ka ong ba UCC kan ktah ruh ïa ka ktien ba ju ïakren ïakhana namar kumba long mynta nalor ka ktien kaba ju ïakren ha la ka jong ka ri, don ruh sa artylli ki jait ktien ba ju ïakren bad kita ki long ka Hindi bad ka Phareng. “Lada la pyndonkam tang kawei ka ktien ha baroh kawei ka ri India, kan wanrah ka jingeh kaba khraw ha ki ki paid nongshongshnong”, la ong ka Synod.
Nalor kine ki daw, ka Synod Sepngi, ka ong ruh ba ka jingpyntreikam ïa ka UCC kan poi shaduh u pud ba yn shah pynduh ki Autonomous District Council kiba la pynkha lyngba ka Khyrnit kaba hynriew jong ka riti synshar jong ka ri. Nalor kine, ong ka Synod ki dang don bun kiwei pat ki jingktha, kibakum ka jaidbynriew kam pat lah ban ïohi lypa mynta bad kiban sa mih ynda la shna ïa ki rule.
