Jowai, Naitung 12 : Ka jingpynslem jong ki bor sorkar ban weng ïa ka Entry Tax Gate kaba don ha ka shnong Khanduli Weat Jaiñtia Hills District ba la pynïeng jubor da ki bor ka Karbi Anglong Autonomous Council (KAAC) naduh u bnai Ïaïong mynta ka snem.
Na ka liang ka Jaiñtia Students’ Movement (JSM) mynta ka sngi kaba lai kala bteng biang ïa ka jingïakhih ba jai jai da kaba shong kyllaiñ myngngor ha phyllaw jong ka Jaiñtia Hills Autonomous District Council (JHADC) ban dawa na ka sorkar ban weng noh ïa katei ka Tax Gate.
Ha kane ka jingshong kyllaiñ myngngor la wan ban ai jingkyrshan ïa ka JSM da ki nongshong Shnong ka Khanduli kynthup naduh ki nongïalam shnong bad ki seng longkmie jong katei shnong kiba la poi ban ïashong lang ha phyllaw ka JHADC.
Na ka liang u Assistant Waheh Shnong ka Khanduli ma ma K. Bina ha ka jingkren sha ki lad pathai khubor ula ong ka jingwan jong ki mynta ka sngi ka long hadien ba la ïoh jingtip ba kawei na ki sengbhalang ka JSM kila mih shakhmat naduh ka 10 tarik ban pynsngew sha ki bor District naduh ka JHADC bad sha ka ophis u Deputy Commissioner ka WJHD halor kane ka jingeh jong ki paidbah kiba don ha khappud.
“La bun sien ngi la dep ban pynsngew ha ki nongmihkhmat halor kane ka jingeh kaba ki ïa kynduh na ka por sha ka por bad ki jaitbynriew Karbi, hynrei haduh mynta ki dang ap khmih lynti ïa ka jingkular ki bor sorkar ban wanrah ïa ka jingshong suk shong shngaiñ” ong u ma Bina.
Ula ong naduh ba la wan buh ïa katei ka Tax Gate kala nang jur shuh shuh ka jingmih huri hura hapdeng ki Pnar bad Karbi wat ïa katei ka Tax Gate la ap pahara mynta da ki pulit Assam, katba ïa ki jaka rep jong ki Pnar kiba don sha thaiñ Karbi la eh sah ïa ki kumto namar bym nud shuh ban leit sha ki jaka rep.
Kawei na ki longkmie na Khanduli ka kong Ribha Muruh kala ong ki nongshong shnong ka Khanduli ki long kum ki khunswet, “ha ka por ba khie thiah mynstep ngi jaw ki ummat haba pyrkhat ïa ki jaka rep namar lada ngi mut ban leit thuh leit tep ym ïoh satia ba don ka jingkhang lad na ki Karbi”. Kamta kala kyntu ïa kane ka seng ba kan long ka nongïalam lynti bad kum ki longkmie ka shnong Khanduli kin bud nadien ban dawa ïa ka hok.
U President JSM Western Region samla Ribok Biam uka kren shai lada ka sorkar kam sngap ïa kane ka jingdawa ha ka sngi kaba lai, na ka liang jong ki kin bteng ïa ka jingïakhih naduh lashai Palei ter ter kaba kham tyngeh kaba lah ban pynduh thiah pynduh dem ïa ki bor pynïaid ka bor District bad ka JHADC.
Katba u Jimmy Raul Kharmuti Working President JSM-CB ula ong kane ka jingeh ki nongshong shnong ka Khanduli kala ktah ïa ka ja kpoh jong ki haka rep ka riang, kumta u kyntu jur ïa u CEM ka JHADC ba un ai ka jingïada bad pynkynriah ïa katei ka Tax Gate bad ki pulit Assam ba ap pahara.
Ha ka juh ka por u phah ka khubor sha u Myntri Rangbah ka Jylla u Conrad K. Sangma lyngba kane ka khubor ba un shim khia ïa kane ka jingeh kaba dei ka hok jong ki paidbah ha Khanduli namar ka jingbym ïoh lad shuh ban leit rung leit mih sha ki jaka rep.
Katba ha ka por janmiet kitei ki nongïalam ka seng ha ryngkat ki nongshong shnong ka Khanduli kila mih na phyllaw ka JHADC bad leit sha shaduh phyllaw ka ophis u Deputy Commissioner ban pyrta bad pynrem jur ïa ka sorkar.
