Mynta yn lum u Dy. CM ïa ka High Level Meeting ban bishar ïa ka shongsuk shongsaiñ

Shillong, Naitung, 12: U Myntri ka Sorkar Jylla u Bah Paul Lyngdoh ha ka sngi Balang u la ïathuh ba u la pynsngew sha u Myntri Rangbah ka Jylla bad ha u Bah Prestone Tynsong uba long u Symbud Myntri Rangbah uba peit ïa ka tnat Kam Pohing pyrshah ïa ka rai jong ka bor synshar district kaba la pynjari da ka Section 144 CrPC ha baroh kawei ka nongbah Shillong naduh ka miet sngi Balang.
Ha ka jingïakren bad ki lad pathai khubor, u Bah Paul u la ïathuh ba u Bah Tynsong un sa lum kyrkieh ïa ka High Level Meeting ha ka sngi Palei ban bishar ïa ka shongsuk shongsaiñ ha ka nongbah Shillong.
“Ngi khmihlynti ba kiei kiei kin sa kylla ynda la shong jingïalang lashai ka sngi,” u la ong.
Ki bor synshar ka East Khasi Hills District ki la pynjari da ka hukum hapoh ka Section 144 CrPC ba la mana ban plie ïa ki dukan, ki dukan die jingbam, ki Restaurant, ha baroh kawei ka sor Shillong hadien ka 10 baje mynmiet.
La mana ruh ban dih ïa ki jingdih pynbuaid bad ban leh ïa ki kam be-aiñ ha ki kali, bad ban tem pynheh sur jingrwai hajan ki shlem pule, ki jaka mane Blei, ki Hospital bad hajan ing ki briew hadien ka 10 baje mynmiet.
Ka jingpynjari ïa ka hukum ka long hadien ba la mih ka jingïakynad hapdeng ki ar kynhun kaba lam sha ka jingshah thang jong ki lai tylli ki kali ha Laitumkhrah Police Station.
“Ha ka jingshisha, da kaba burom ïa ki ophisar haba phi ïohi ïa ki dukan kiba plie hangta ka jingshngaiñ ruh ka don. Phin kham sngew shngaiñ haba ki dukan ki plie, haba ki Mall ki plie. Ki paidbah haba ki ïaid lynti ruh ki sngew shngaiñ. Hynrei lada khang dam lut baroh kumno phin pynthikna ba ka jinglong jingman kan long kaba shngaiñ?” la buh jingkylli u Bah Paul.
“Ki jingjia kin don beit hangne hangtai. Ym tang ha Shillong, ki lah ban jia ha New York, ha Paris bad kata kam mut ba phin hap ban khang dam lut baroh,” u la bynrap.
Halor ka jingpynksan jong ka Deputy Commissioner ïa ka hukum da kaba bthah ïa ki paidbah ban leit phai noh sha la ing hadien ka 10 baje mynmiet, u Bah Paul u la ong, “kumno phin pynshlur ïa ki nongseng kam na ka jylla kiba phai khmat sha ki kam jngohkai pyrthei lada hap khang lut ha ka por 10 baje mynmiet bad kaei ka ban jia lada phi don kiba wad ing basa ha ka por 10 baje bad kim ïoh jingbam, hato phin ong ïa ki ban ap haduh ban da ïoh da ka sha step?”
U Bah Paul uba long ruh u Myntri ka tnat Social Welfare u la ong, ha ka jingshisha baroh ki la sdang ban wandur ha nongbah Shillong lada phi peit na ki jingïoh kem jong ki Pulit bad ka jingkhynra ïa ki briew kiba donkti ha ki kam khaii drok bad kiwei kiwei ki jingdih pynbuaid. “Phin ïohi da ki phew ngut ki briew kiba la shah kem, mynta ngi la pynbna ruh ban pyntreikam da ka PITNDPS kaba thymmai kaba don ïa ki bniat kiba nep, ngi khmihlynti ba kane ka aiñ kan treikam da kaba tyngeh.”
“Ban shu set ïa ki briew tang ha ki shnong ba ki shong ki sah kan ym weng satia ïa ki jingeh, hynrei kna pynkharoi pynban ïa ki jingsniew ha kito ki shnong,” la pynpaw u Bah Paul ïa ka jingsngew jong u shimet.
“Ka Shillong ka la nang ïar na ki snem sha ki snem bad nga thikna ba bun na ki nognshong shnong ki dei kiba khraw ka pyrkhat pyrdaiñ ki bym kwah ban ïakyrsum ha ki kam runar ruser,” u la bynrap.