Ka die ka thied ka dang thnem bha, ym banse pat ban lum noh ba la treikam ka 144 Cr.PC

Shillong, Naitung 12: Ka dei ka por kaba dang thnem bha ka die ka thied,khamtam ha Motphran bad katto katne ki jaka, hynrei ki nongdie kim banse ban lum noh ki tiar ki tar jong ki, namar ba ki Pulit ki la phah lum noh na ka daw ba la pyntreikam ïa ka Kyndon 144 Cr. PC.
Kane ka kyndon ka la treikam naduh ka 10 baje mynmiet jong ka 12 tarik mynta u bnai. Ka daw ka long katkum jingong ka DC jong ka East Khasi Hills District, ka Kong RM Kurbah ba hadien ka 10 baje mynmiet ki ju mih ki jingïakulmar bad ki jingïasoh ïadat.
Ha Motphran ki nongdie jingdie kiba la ïoh ban ïakren ki la pynpaw ka jingsngew diaw kaba jur ïa kane ka jingpynjari ki bor synshar District, namar ka la ktah jur ïa ka die ka thied jong ki. “Ngi sdang ban die hangne naduh ka por 6 baje janmiet bad haduh 11 baje ruh ngi shong hangne ym ju kham don kita ki jingkulmar”, la ong ki nongdie jhur kiba na Mawlai.
Kiba die jingbam Standing Mess ki la ïathuh ba ki ju die ha Motphran haduh 11 bad 12 baje shiteng synñia bad kim ju kham lap ban don kita ki jingïashoh ïadat lait noh tang teng khat lano ba ïakynroi haba don ki nongdih, tanba kam ju poi shaduh ka jingïashoh ïadat kumba ong ki bor sorkar.
Iwei i longkmie ba die phan ha Motphran, iba sah ha Laban, i la pynpaw ka jinglyngngoh ïa ka jingong ka sorkar ba Shillong kam shngaiñ shuh palat ïa ka 10 baje mynmiet, namar ba i, i ïaid beit da ka kjat na Motphran shaduh Laban bad ym ju don eiei ha lynti ban pynwit ne ban ktah kti. “La 18 snem nga die jingdie bad ïaid da ka kjat ym don ba pynwit ne ngam ju lap kita kiba ïashoh ïa dat ha lynti bad nga poi suk sha ïing”, i la ong.
Kane kane ka hukum khang dukan ha Shillong ha ka poe 10 baje mynmiet, ym tang ba ka la pyndom ïa ki paidbah, hynrei ka la pyndom ruh wat ïa u wei u Myntri jong ka sorkar, u Bah Paul Lyngdoh, Myntri ka tnadTourism, uba la ong ba kane ka hukum kan ktah shibun ïa ka kam shang pyrthei ha ka jylla bad u la pynpaw ba um ïahap satia ïa kane ka jingleh ki bor District.
Mynta ka miet la ïohi ba ki Pulit bad ki CRP ki la wan phang khang noh ïa kid dukan bad phah lum noh ïa ki jingsiew hadien ba ladap ka por 10 baje.