Thoh ka HYC sha ka Law Commission ban ym pyntreikam ka Sorkar India ïa ka UCC ha Meghalaya

Shillong, Naitung, 05: Ka Hynñiewtrep Youth Council (HYC) ha ka sngi Baar ka la kyrpad ïa ka Law Commission ban ai jingmut ïa ka Sorkar Pdeng ba kan ym pyntreikam ïa ka Uniform Civil Code (UCC) ha Meghalaya.
Ha ka shithi ba la phah sha u Member Secretary jong ka Law Commission, u President ka HYC u Bah Robertjune Kharjahrin u la ong, “ngi kwah ban ai jingmut ïa ka Commission ba kan ai jingmut ïa ka Sorkar Pdeng ba kan ym pyntreikam ïa ka UCC ha Meghalaya namarba kan pynjngut bad kan bujli ïa ki riti ki dustur kiba la don lypa, kan pynjngut noh ïa ki kyndon jong ka Sixth Scheduled bad ïa ka iktiar jong ki Autonomous District Councils, kan pynkheiñ ïa ka jingïasam ïa ka bor treikam hapdeng ka Sorkar Pdeng bad ki Sorkar Jylla bad kan tuklar ruh ïa ki kam kiba ïadei bad ki niam.”
“Shuh shuh, ngi ai jingmut ïa ka Commission ba kan ai jingmut ïa ka Sorkar India ba kan ïarap ïa ki Autonomous District Councils ha Meghalaya ha ka jingkyrshan pisa bad kiwei kiwei de ki lad jingïarap bad ban ïalam lynti ha kaba pynlong aiñ ïa ki aiñ bapher bapher,” la bynrap ka seng.
U Bah Kharjahrin u la ong ba ki ADC ha Meghalaya ki hap hapoh ka Sixth Scheduled jong ka riti synshar ka ri India ki dei kiba la pynkup bor ban shna aiñ halor ka shongkha shongman, ka jingïoh pateng ïa ka spah ka phew, ka riti ka dustur ba kynthup ïa ka jinghiar pateng, ka jingting khun, ka jingpynryntih ïa ki kam kur bad kiwei kiwei ki aiñ. La jan palat 72 snem ka jingdon jong kine ki ADC ha Meghalaya, tad haduh mynta ki la pyndep ïa la ka kamram ban ïada bad ban pynneh pynsah ïa ki riti ki dustur jong ka jaidbynriew Khasi-Jaiñtia ha kaba ïadei bad ki aiñ.
Ki riewlum ritpaidbah ka jylla ki dang don ka jingshahniah ha kine ki ADC bad ki dang ïai kwah ban shah synshar da ki riti ki dustur bad ki jingngeit kiba la don lypa. Ki riewlum ritpaid ka Meghalaya ki pyrshah jur ïa kano kano ka jingthmu jong kano kano ka bor kaba thmu ban pynjngut noh ïa ki riti ki dustur kiba la don lypa ha kine ki rilum naduh hyndai hynthai.
“Namarkata, ngi lah ban ong ba ki riewlum ritpaid ka Meghalaya ki da pyrshah jur ïa kano kano ka jingpyrshah ban wanrah ïa ka Uniform Civil Code namarba ym tangba kan pynjngut hynrei kan bujli noh wat ïa ki riti ki dustur kiba la don lypa ha ka jylla,” u la ong.
U la bynrap shuh shuh ba ki aiñ kum ka shongkurim, ka jingïapyllait san shyieng, ka jingïoh pateng, ka jingting khun bad kiwei kiwei ki dei ki bor jong ka Sorkar Jylla.
“Ka Jylla Meghalaya ka la don lypa ïa ki aiñ kum ka shongkurim, ka jingïapyllait san shyieng, ka jingïoh pateng, ka jingting khun bad kiwei kiwei bad ïa kine la pyntreikam bad la pdiang ruh da ki paidbah jong ka Jylla. Lada ka Parliament jong ka ri India ka wanrah ïa ka UCC, kan pynkheiñ ïa ka jingïasam bor hapdeng ka Sorkar Pdeng bad Sorkar Jylla katkum ba la kdew ha ka riti synshar ka ri India ïa kaba yn ym lah satia ban pdiang,” la ong ka Seng.
Haba pynpaw ba ka India ka dei ka ri kaba kdup ïa ki jaitniam bapher bapher, ka HYC ka la ong riti synshar ka ri India ka ai jingïada ïa kawei pat kawei ka jait niam. Ka Meghalaya ka dei ka jylla ha kaba bun ki nongshong shnong ki dei ki Khristan bad ki don ruh ki briew kiba dang ksoh ha la ka niam tynrai ryngkat bad kiwei kiwei pat ki jait niam kum ki Hindu, ki Muslim bad kiwei kiwei.
“Ngi sngew ba ka dei ka kamram jong kano kano ka Sorkar ban burom ïa kawei pa kawei ka jaitniam da kaba ailad ïa kine ki jait niam ba kin bud ïa la ki jong ki rukom ngeit bad ym ban bujli noh da ki kyndon kiba don katkum ka Uniform Civil Code,” u la ong.
U la bynrap ba ka riti synshar ka ri ka kyntiew ïa ki riti ki dustur bapher bapher, ïa ki jaitniam bad ïa ki jait ktien bapher bapher. Ka dei ka jingsngew jong ngi ba ki polisi kum ka UCC kin wanrah jingkulmar bad donkam ban kyntait beit mardor. Shuh shuh ka 21st Law Commission of India hadien ba la bishar sani bha ha kaba ïadei ba ka jingpynthymmai ïa ka Family Law ha ri India ka la aiti ïa ka kaiphod ha u Nailar, 2018 bad ka la ai jingmut ba ka Uniform Civil Code kam da long eh kaba donkam lane kaba dei beit ban pyntreikam,” u la ong.